“O‘zdonmahsulot” kompaniyasi tizimi korxonalari tomonidan ishlab chiqarilgan bir qop un uchun 125 ming so‘m qilib belgilandi, ayni vaqtda unni birja savdolarisiz, to‘g‘ridan to‘g‘ri shartnomalar bilan sotish tartibi joriy etiladi. Bu haqda kompaniya matbuot xizmati “Daryo”ga ma’lum qildi.
Xabar berishlaricha, Vazirlar Mahkamasida 16-aprel kuni Koronavirus pandemiyasi sharoitida respublika aholisini davlat resurlari hisobiga un mahsulotlarini tizimli va kafolatli yetkazib berish masalalariga bag‘ishlangan yig‘ilish o‘tkazilgan.
Yig‘ilishda koronavirus pandemiyasi sharoitida yuzaga kelgan vaziyatni inobatga olib, barcha hududlarga bir maromda un yetkazib berilishini ta’minlash maqsadida, mahsulotni birja savdolarisiz, to‘g‘ridan to‘g‘ri shartnomalar bilan sotish bo‘yicha bo‘yicha topshiriq berilgan.
Shuningdek, hukumat topshirig‘iga asosan “O‘zdonmahsulot” korxonalarida ishlab chiqarilgan bir qop un uchun 125 ming so‘m qilib belgilangan. Qayd etishlaricha, un mahsulotlari narxlarining shakllanishi soliq va huquqni muhofaza qilish organlari tomonidan qat’iy nazoratga olingan.
“O‘zdonmahsulot” vakillarining “Daryo”ga ma’lum qilishicha, bugungi kunda unning birja savdolari orqali sotilishi mahsulotning asosiy qismi O‘zbekistonning chekka hududlariga yetib bormay, shahar hamda tuman markazlarida qolib ketishiga sabab bo‘layotgan edi.
“Yangi joriy etilgan tartibda esa unning olib-sotarlar tomonidan qo‘ldan qo‘lga o‘tkazilishi oqibatida narxi sun’iy tarzda o‘sib ketishining ham oldi olinadi”, — deydi kompaniya vakillari.Ma’lumot uchun, hozirda “O‘zdonmahsulot” korxonalari tasarrufidagi 52 ta tegirmon sexlarida har kuni 6 ming tonnadan ortiq un ishlab chiqarilmoqda. Korxonalar omborlarida 32 ming tonnadan ortiq un zaxirasi bor va ehtiyojdan kelib chiqib, ishlab chiqarish xajmini oshirish imkoniyatlari mavjud. Don zaxirasi ham yetarli miqdorda.
Izoh (0)