Коронавирусга чалинган беморларни даволаш учун Бельгияда ишлаб чиқарилган 1,6 миллиард сўмлик эксперт тоифасидаги Caelus Lite наркоз-нафас олиш аппаратлари Ўзбекистон Соғлиқни сақлаш вазирлигига беғараз тақдим этилди.
Вазирликнинг Жамоатчилик билан алоқалар бўлимидан маълум қилишларича, Medec компаниясининг анестезиология станциялари соҳасидаги 40 йиллик тажрибаси маҳсули ҳисобланган ушбу аппаратнинг асосий вазифаси — анестезиология бўлиб, айни пайтда ўпкани сунъий шамоллатиш вазифасини ҳам бажаради.
International Beverages Tashkent компанияси директори Музаффар Солижоновнинг айтишича, ушбу аппаратларни сотиб олишдан аввал вазирлик вакиллари билан маслаҳатлашилган. «Ушбу аппаратлар коронавирусга чалинган, аҳволи оғир беморларнинг тезроқ соғайишига кўмаклашади, шифокорларимизга яқиндан ёрдам беради, деб умид қиламиз», — деди у.
Аввалроқ Президент Шавкат Мирзиёев 17 апрель куни бўлиб ўтган йиғилишда халқаро молия институтларининг 30 миллион доллар маблағи эвазига ўпкани сунъий вентиляция қилувчи 2,3 мингта аппарат сотиб олиш ҳақида кўрсатма берган эди.
Сўнгги маълумотларга кўра, Соғлиқни сақлаш вазирлиги ҳузуридаги «Меҳр-шафқат ва саломатлик» фондига коронавирус тарқалишига қарши чоралар кўрила бошланганидан бери 67 миллиард сўмдан ортиқ хайрия маблағлари келиб тушган.
Изоҳ (0)