Toshkentda koronavirus infeksiyasini yuqtirib olgan 77 yoshli ayol vafot etdi, deya xabar bermoqda Sog‘liqni saqlash vazirligi matbuot xizmati.
Xabar berishlaricha, Toshkent shahrida istiqomat qiluvchi A. ismli ayol surunkali bronxit, o‘ng o‘pka atelektazi, gipertoniya kasalligi bilan 7-aprel kuni karantinga olingan. Tezkor diagnostik tahlillardan so‘ng bemorda koronavirus infeksiyasi aniqlangan.
Shundan so‘ng ixtisoslashgan tibbiy yordam ko‘rsatish maqsadida bemor Toshkent tibbiyot akademiyasining ko‘p tarmoqli klinikasiga o‘tkazilgan. Biroq ko‘rsatilgan tezkor reanimatsion muolajalarga qaramay, bemor 18-aprel kuni vafot etgan.
“Bemor koronavirus infeksiyasi asoratlari — ikki tomonlama bronxopnevmoniyaning og‘ir kechishi, o‘tkir nafas yetishmovchiligi va o‘pka shishidan vafot etdi”, — deyiladi Sog‘liqni saqlash vazirligi axborotida.
Bu O‘zbekistonda koronavirusga chalingan bemorning vafot etishi bilan bog‘liq beshinchi holatdir. Bungacha
- 27-mart kuni Namangan viloyatida Umradan qaytgan qizidan koronavirus yuqtirib olgan 72 yoshli onaxon miokard infarktidan (uning janozasida qarindoshlaridan hech kim ishtirok etmagan),
- 28-mart kuni Toshkent shahrida o‘zini uyda davolashga uringan 39 yoshli (erkak) shifokor koronavirus infeksiyasidan,
- 7-aprel kuni koronavirusga chalingan 40 yoshli erkak yurak va o‘pka yetishmovchiligidan,
- 11-aprel kuni esa xorij safaridan koronavirusga chalinib qaytgan farg‘onalik 59 yoshli ayol o‘tkir respirator disstres sindrom, o‘tkir nafas yetishmovchiligi hamda o‘pka-yurak yetishmovchiligi oqibatida
Bundan tashqari, xorijda 73 nafar o‘zbekistonlik koronavirusga chalingani ma’lum (eng ko‘p — 42 ta — kasallanish holati Rossiyada qayd etilgan); ularning kamida to‘rt nafari vafot etgan — uch nafari AQShda, bir nafari esa Rossiyada.
Izoh (0)