Тошкентда коронавирус инфекциясини юқтириб олган 77 ёшли аёл вафот этди, дея хабар бермоқда Соғлиқни сақлаш вазирлиги матбуот хизмати.
Хабар беришларича, Тошкент шаҳрида истиқомат қилувчи А. исмли аёл сурункали бронхит, ўнг ўпка ателектази, гипертония касаллиги билан 7 апрель куни карантинга олинган. Тезкор диагностик таҳлиллардан сўнг беморда коронавирус инфекцияси аниқланган.
Шундан сўнг ихтисослашган тиббий ёрдам кўрсатиш мақсадида бемор Тошкент тиббиёт академиясининг кўп тармоқли клиникасига ўтказилган. Бироқ кўрсатилган тезкор реанимацион муолажаларга қарамай, бемор 18 апрель куни вафот этган.
«Бемор коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан вафот этди», — дейилади Соғлиқни сақлаш вазирлиги ахборотида.
Бу Ўзбекистонда коронавирусга чалинган беморнинг вафот этиши билан боғлиқ бешинчи ҳолатдир. Бунгача
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган),
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан,
- 7 апрель куни коронавирусга чалинган 40 ёшли эркак юрак ва ўпка етишмовчилигидан,
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дисстрес синдром, ўткир нафас етишмовчилиги ҳамда ўпка-юрак етишмовчилиги оқибатида
Бундан ташқари, хорижда 73 нафар ўзбекистонлик коронавирусга чалингани маълум (энг кўп — 42 та — касалланиш ҳолати Россияда қайд этилган); уларнинг камида тўрт нафари вафот этган — уч нафари АҚШда, бир нафари эса Россияда.
Изоҳ (0)