Koronavirus bo‘yicha maxsus komissiyaning qarorlari nima uchun to‘liq e’lon qilinmayapti? Adliya vazirligi izoh berdi

O‘zbekiston Adliya vazirligining Telegram’dagi “Huquqiy axborot” kanalida koronavirus pandemiyasi masalasida tuzilgan Respublika maxsus komissiyasining qarorlari nima uchun to‘liq ko‘rinishda e’lon qilinmayotganligi haqida berilgan savolga javob qaytardi.

Izohga ko‘ra, maxsus komissiya qarorlari bayonnoma ko‘rinishida rasmiylashtiriladi va komissiya barcha vakolatlarga ega.

Yodda tutish lozimki, maxsus komissiya yuz berayotgan hodisalarga nisbatan tezkor javob berish maqsadida tashkil etilgan. Zarur bo‘lganda epidemiologik vaziyat o‘zgarishi natijasida yuzaga kelayotgan kompleks masalalarni yechish va ularga javob berish, jumladan, muammolarni turli xususiyatga ega bo‘lgan maxsus mexanizmlarni ishga solish orqali hal etish bilan bog‘liq kechiktirib bo‘lmaydigan qarorlarni qabul qilishga to‘g‘ri keladi.

Shu munosabat bilan maxsus komissiya tomonidan qabul qilinayotgan qarorlar to‘liqsiz ko‘rinishda e’lon qilinmoqda.

Shu bilan birga ushbu qarorlarning aholi va yuridik shaxslarga taalluqli qismlari maxsus komissiyaning rasmiy bayonoti tarzida berib borilmoqda.

Mazkur axborot har kuni aholi bilan muloqot qilish mumkin bo‘lgan barcha aloqa kanallari orqali tarqatilmoqda. Markaziy telekanallar orqali to‘g‘ridan to‘g‘ri jonli efirga uzatilayotgan va yirik ijtimoiy tarmoqlar sahifalarida translyatsiya qilinayotgan kundalik brifinglar qabul qilinayotgan ushbu qarorlarni tushuntirishga qaratilgan. Har bir qaror ixtisoslashgan mutaxassislar tomonidan sodda tilda tushuntirib borilmoqda.

Bundan tashqari, komissiyaning barcha qarorlarini targ‘ib qilishga maxsus komissiya va barcha davlat organlari ulkan sa’y-harakatlari safarbar qilingan, deyiladi Adliya vazirligining xabarida.