Qarshi shahridagi “Vatanparvarlar” bog‘i xodimlarining 2020-yil yanvar, fevral va mart oyida to‘lanmay qolgan oylik-maoshi to‘lab berildi. Bu haqda “Daryo”ga bog‘ direktori Tojinur Shukurov ma’lum qilmoqda.
Ta’kidlanishicha, bog‘ xodimlarining 70 million so‘mdan ortiq maoshi 10-aprel, juma kuni, to‘liq to‘langan.
“24 nafar ishchi xodimning to‘lanmay qolgan oylik-maoshi viloyat moliya boshqarmasi tomonidan to‘lab berildi. Endilikda xodimlarimiz viloyat bandlik boshqarmasi hisobida turadi va maoshni ham boshqarma ishchisi sifatida oladigan bo‘ldi”, — deydi Tojinur Shukurov.
Mazkur xabarni “Daryo”ga murojaat qilgan bog‘ xodimi ham tasdiqladi.
“Haqiqatan ham bugun uch oylik maoshimizni oldik. Barcha hamkasblar xursand. Hamma uyiga bozor qilib, xursand kayfiyatda qaytdi. Bizning muammoyimizga e’tibor qaratgan rahbarlarga alohida rahmat”, — deydi ismi sir qolishini so‘ragan murojaatchi.
Eslatib o‘tamiz, “Daryo”ga shikoyat qilgan bog‘ ishchisi 24 nafar xodimning uch oylik-maoshi to‘lanmayotganini aytgandi. Bog‘ direktori bunga javoban 2020-yil uchun xodimlar maoshi moliyalashmaganini, bog‘ Mudofaa vazirligi tasarrufiga olinmaganini bildirgandi.
Izoh (0)