Birlashgan Arab Amirliklari hukumati koronavirus tarqalishi xavfi sabab mamlakatdagi xorijiy davlat fuqarolari va yashash huquqiga ega shaxslarning vizasini joriy yil oxiriga qadar uzaytirish bo‘yicha qaror qabul qildi. Bu haqda mamlakat bosh vaziri Muhammad ibn Rashid al-Maktum o‘zining Twitter’dagi sahifasi orqali ma’lum qilgan.
Bosh vazirning ta’kidlashicha, vazirlar mahkamasining videokonferensiya ko‘rinishida o‘tgan yig‘ilishi davomida mamlakatda yashash huquqiga ega bo‘lganlarning vizasini uzaytirish to‘g‘risida qaror qabul qilingan. Ushbu toifadagi rezidentlardan bu kabi holatlarda soliq olinmaydi.
BAA vazirlar mahkamasi mamlakatning strategik zaxirasini mustahkamlash to‘g‘risida qaror ham qabul qilgan, shuningdek, davlat korxonalariga ishlab chiqarishni sog‘liqni saqlash sohasi ehtiyojlarini maksimal darajada qondirishga moslashtirish bo‘yicha ko‘rsatma bergan.
Ayni vaqtda BAAda koronavirus bilan kasallanganlar soni 1799 kishiga yetdi, 10 kishi vafot etgan. Eslatib o‘tamiz, mart oyining oxirlarida BAA O‘zbekistonga ijtimoiy yordam jo‘natgan edi.
Izoh (0)