Alisher Shodmonov: “Barcha viloyatlarda yuqori malakaga ega mutaxassislarimiz mavjud”

O‘zbekiston Sog‘liqni saqlash vaziri Alisher Shodmonov viloyatlar shifoxonalari koronavirus kasalligiga qarshi kurashishga tayyor ekani haqida ma’lum qildi, deb xabar beradi O‘zA.

Barcha viloyatlarda yuqori kompetensiyaga ega, ya’ni o‘qitilgan mutaxassislarimiz mavjud. Bundan tashqari, sanitariya-epidemiologik osoyishtalik agentligining viloyatlarda koronavirus tarqalishi epidemiyasiga qanday chek qo‘yish kerakligini biladigan mutaxassislari bor. Jahon sog‘liqni saqlash tashkiloti bilan birgalikda biz tayyorgarlik jarayonlarini o‘rganib chiqdik hamda mutaxassislarimizni o‘qitib, tayyorladik. Shuningdek, viloyatlardagi har bitta shifoxonada dezinfeksiya, individual himoya vositalari va dori-darmonlar zaxirasi yaratilgan hamda puxta tayyorgarliklar ko‘rilgan.

Alisher Shodmonov, sog‘liqni saqlash vaziri

Avvalroq, O‘zbekistonda koronavirusga chalinganlar soni olti nafarga yetgani haqida xabar berilgandi. 11-mart kuni Fransiyadan qaytgan O‘zbekiston fuqarosida COVID-19 koronavirusi 15-mart kuni aniqlangach, u bilan muloqotda bo‘lgan barcha oila a’zolari ham Respublika Virusologiya ilmiy tekshirish instituti klinikasi yotqizilgan. Ma’lumotlarga ko‘ra, tahlil natijalari bemorning o‘g‘li va qizida koronavirus infeksiyasi borligini ko‘rsatgan. Shuningdek, 15-mart kuni soat 05:15 da Uzbekistan Airways aviakompaniyasining “Istanbul—Toshkent” yo‘nalishidagi 274-reysi bilan kelgan O‘zbekiston fuqarosida ham koronavirus aniqlangan.