Namangan shahar hokimligida koronavirus tarqalishining oldini olish bo‘yicha maxsus shtab tashkil etildi. Bu haqda “Daryo” muxbiri Azizbek Abduvaliyev xabar bermoqda.
Mazkur shtab ko‘rsatmasiga binoan, viloyat markazidagi barcha bozorlar va jamoat transporti vositalari dezinfeksiyadan o‘tkazildi. Bozorlarning uzluksiz ishlashi ta’minlandi.
Shahardagi barcha mahalla fuqarolar yig‘inlari, do‘konlar, aholi gavjum bo‘ladigan manzillarga koronavirusdan saqlanish usullari ko‘rsatilgan varaqalar yopishtirildi.
Reklama tablolarida esa Sog‘liqni saqlash vazirligi tomonidan tayyorlangan videoroliklar aylantirilmoqda.
Shahar hokimligi shtabi koronavirus vahimasi tufayli narx-navo asossiz oshib ketishining oldini olish bo‘yicha harakatlarni ham muvofiqlashtirmoqda. Buning uchun tashkil etilgan ishonch telefoniga hozirgacha 100 dan ortiq murojaat kelib tushdi.
Murojaatlarda asosan bozor va do‘konlarda kartoshka, un, yog‘ qimmatlagani, Toshkent—Namangan yo‘nalishidagi yo‘lkiralar oshgani, dorixonalarda tibbiyot niqoblari va qo‘llarni dezinfeksiyalovchi vositalar tanqisligi yuzaga kelganligi bildirilgan.
Shahardagi eng yirik Chorsu va Sardoba bozorlaridagi o‘rganishlar chog‘ida kartoshka 2,5 ming so‘mdan 5 ming so‘mgacha sotilayotgani ma’lum bo‘ldi. Afsuski, kartoshkani qoplab xarid qilib, sun’iy taqchillik kelib chiqishi va narx-navo oshishiga xaridorlarning o‘zi ham sababchi bo‘lib qolmoqda.
Vaholanki, viloyat markaziga kartoshka yetishtirishga ixtisoslashgan Yangiqo‘rg‘on tumani va Rossiyadan 15-mart, yakshanba kuni, ham katta miqdorda kartoshka yetkazib kelingan.
Shahar mutasaddilari ijtimoiy tarmoqlar orqali aholiga murojaat qilib, vahimaga o‘rin yo‘qligi, Namanganda yetarlicha oziq-ovqat zaxiralari mavjudligini ta’kidlamoqda. Bu urinishlar o‘z samarasini berishi va mahalliy bozorlar, do‘konlardagi narx-navo tez orada barqarorlashishiga umid bildirilmoqda.
Izoh (0)