Алишер Шодмонов: «Барча вилоятларда юқори малакага эга мутахассисларимиз мавжуд»

Ўзбекистон Соғлиқни сақлаш вазири Алишер Шодмонов вилоятлар шифохоналари коронавирус касаллигига қарши курашишга тайёр экани ҳақида маълум қилди, деб хабар беради ЎзА.

Барча вилоятларда юқори компетенцияга эга, яъни ўқитилган мутахассисларимиз мавжуд. Бундан ташқари, санитария-эпидемиологик осойишталик агентлигининг вилоятларда коронавирус тарқалиши эпидемиясига қандай чек қўйиш кераклигини биладиган мутахассислари бор. Жаҳон соғлиқни сақлаш ташкилоти билан биргаликда биз тайёргарлик жараёнларини ўрганиб чиқдик ҳамда мутахассисларимизни ўқитиб, тайёрладик. Шунингдек, вилоятлардаги ҳар битта шифохонада дезинфекция, индивидуал ҳимоя воситалари ва дори-дармонлар захираси яратилган ҳамда пухта тайёргарликлар кўрилган.

Алишер Шодмонов, соғлиқни сақлаш вазири

Аввалроқ, Ўзбекистонда коронавирусга чалинганлар сони олти нафарга етгани ҳақида хабар берилганди. 11 март куни Франциядан қайтган Ўзбекистон фуқаросида COVID-19 коронавируси 15 март куни аниқлангач, у билан мулоқотда бўлган барча оила аъзолари ҳам Республика Вирусология илмий текшириш институти клиникаси ётқизилган. Маълумотларга кўра, таҳлил натижалари беморнинг ўғли ва қизида коронавирус инфекцияси борлигини кўрсатган. Шунингдек, 15 март куни соат 05:15 да Uzbekistan Airways авиакомпаниясининг «Истанбул—Тошкент» йўналишидаги 274-рейси билан келган Ўзбекистон фуқаросида ҳам коронавирус аниқланган.