16-mart kuni Sirdaryo viloyati hokimi G‘ofurjon Mirzayev va oziq-ovqat mahsulotlari do‘konlaridagi narx-navo bilan tanishish maqsadida Guliston shahridagi dehqon bozoriga keldi, deb xabar berdi “Sirdaryo xabarlari” Telegram kanali.
“Bozorda odatdagidek jarayon. Xaridorlar oqimi ham har kungidek. Biron rasta yoki savdo do‘konida navbatda turganlar ko‘rinmaydi. Un, yog‘, shakar va boshqa kundalik ehtiyoji hamda hayotiy zarurati baland bo‘lgan mahsulotlar sotilayotgan do‘konlarda ham ana shunday ijobiy holat.
Viloyat rahbari sotuvchilar va xaridorlar bilan suhbatlashdi. Mamlakatda oziq-ovqat mahsulotlari va boshqa kundalik ehtiyoj mollarining yetarli zaxirasi mavjudligi, hech qanday vahimaga o‘rin yo‘qligi xususida gapirib, savdo, sanitariya-gigiyena qoidalariga qat’iy rioya qilish, ayniqsa narx-navoni sun’iy oshirib yubormaslik bo‘yicha tavsiyalarini berdi.
Aytish lozimki, mazkur yangi bozor Guliston shahrining eng yirik savdo markazi hisoblanadi. Bu yerdagi ulgurji savdodan nafaqat deyarli butun Sirdaryo, qolaversa qo‘shni viloyatlarga ham turli mahsulotlar tarqatiladi. Yaqinda foydalanishga topshirilgan ‘Xumo’ savdo markazi ham bozor hududida joylashgan.
Ushbu supermarketning bunyod etilishi tufayli ko‘plab ish o‘rinlari yaratilishi bilan birga yirik zamonaviy savdo tizimi ham yaratildi. Bozor yaqinidagi ‘O‘zbekiston’ ko‘chasining qiyofasi esa tubdan yangilanmoqda. Ikki chetini 5—7 qavatli binolar qurshayotgan bu muhtasham yo‘l atrofida so‘lim xiyobonlar ham tashkil qilinayotir. Viloyat hokimi ushbu qurilish-obodonlashtirish ishlari bilan ham yaqindan tanishdi”, — deyiladi xabarda.
Eslatib o‘tamiz, hozirda O‘zbekistonda koronavirusga chalinganlar soni olti nafarga yetdi. Virusologiya ilmiy tekshirish instituti direktori Erkin Musaboyevning aytishicha, O‘zbekistonda koronavirusga chalingani aniqlangan olti bemorning ahvoli qoniqarli.
O‘zbekistonda 15-mart, yakshanba kuni, koronavirusga chalinish bilan bog‘liq ilk holat qayd etilgan edi. Virus 11-mart kuni Fransiyadan qaytgan ayolda aniqlangan edi. Keyinroq, 16-martga o‘tar kechasi COVID-19 koronavirus kasalligini yuqtirgan fuqarolar soni yana uch nafarga ko‘paygani ma’lum bo‘ldi.
Ulardan biri 15-mart kuni tongda Istanbuldan qaytgan erkak bo‘lsa, qolgan ikki nafari birinchi bemor — 11-mart kuni Fransiyadan qaytgan ayolning o‘g‘li va qizi ekani ma’lum qilingan edi. Ma’lum qilishlaricha, ayni paytda ushbu fuqaroning turmush o‘rtog‘i va nevarasida ham koronavirus infeksiyasi qayd etilgan.
Avvalroq Bosh vazir Abdulla Aripov tomonidan koronavirusga qarshi kurash chora-tadbirlari xususida o‘tkazilgan matbuot anjumanida karantin sharoitida narxlarni sun’iy oshirgan “savdogarlar”ga nisbatan jinoiy jazo tayinlanishi mumkinligi ma’lum qilindi. Koronavirus profilaktikasi doirasida Toshkent shahridagi bozorlar yopilmaydi.
Izoh (0)