Ўзбекистон Савдо-саноат палатаси ва Туркия Иқтисодиёт ва технологиялар университети ўртасида мазкур олий ўқув юртининг Тошкентдаги филиалини очиш бўйича меморандум имзоланди. Бу ҳақда палата матбуот хизмати хабар берди.
Қайд этилишича, Ўзбекистон Президенти Шавкат Мирзиёевнинг Туркияга расмий ташрифи доирасида Анқара шаҳрида ўтказилган олий даражадаги Ўзбекистон—Туркия биринчи стратегик ҳамкорлик йиғилиши натижалари бўйича қўшма баёнот имзоланди.
Мавзига доир: Анқарада олий даражадаги Ўзбекистон—Туркия стратегик ҳамкорлик кенгашининг биринчи йиғилиши бўлиб ўтди
Тадбир доирасида икки давлат ўртасидаги савдо-иқтисодий алоқалар бўйича ҳам қатор келишувларга эришилди. Хусусан, Ўзбекистон Савдо-саноат палатаси ва Туркия савдо палаталари ва биржалари иттифоқи ҳузуридаги Туркия Иқтисодиёт ва технологиялар университетининг Тошкентдаги филиалини очиш тўғрисидаги меморандум имзоланди.
Маълум қилинишича, Ўзбекистонда мазкур олий ўқув юрти филиалини очиш ташаббуси 2019 йил октябрь ойида Тошкентда бўлиб ўтган Туркий тилли давлатлар ишбилармонлар кенгаши доирасида ўтказилган музокараларда илгари сурилган ва келишилган.
Тошкентда фаолият бошлаши кўзда тутилган университет филиали дуал таълим тизими асосида бизнес ва тадбиркорлик йўналишларида мутахассислар тайёрлаши кутилмоқда.
Аввалроқ Тошкентда Россиянинг А.И.Герцен номидаги Россия давлат педагогика университети филиали ҳамда Япония рақамли университети очилиши ҳақида хабар берилган эди.
Изоҳ (0)