Qarshi shahrining shundoqqina biqinida yashovchi mahalla ahli elektr toki kuchlanishi pastligi, mahalladagi qo‘lbola simyog‘ochlar bolalar hayotiga xavf solishi hamda yo‘lning abgorligidan shikoyat qilmoqda. Bu haqda “Daryo”ga murojaat qilgan mahalla ahli 10 yildirki na hokim, na prokuror, IIB boshlig‘i-yu, soliq rahbari ham mahalla taqdiri bilan qiziqmaganidan nolimoqda.
“Bir kuni mahallada janjal bo‘lib qoldi, Qarshi shahar IIBga qo‘ng‘iroq qilib, profilaktika inspektorini chaqirsak, inspektor mahalla boshiga kelib, ‘Bu mahalla shahar hududiga kirmaydi’, deya qaytib ketdi. Qarshi tuman IIB profilaktika inspektori ham mazkur mahalla tuman tarkibiga kirmaydi, shuning uchun, bu muammoga biz aralashmaymiz, deb ishni e’tiborsiz qoldirdi. 10 yildirki shunday arosatda yashayapmiz, — deydi aholi vakillaridan biri To‘ychi Do‘stqobilov. — Mahallamiz hujjatda Qarshi shahar hududiga kirishi yozilgan. Ammo mutasaddilar bizning shahar hududiga kirishimizni tan olishmaydi. Shu sabab ham mahallamizga 4 ta sektor rahbaridan birortasi kelmagan”.
Qarshi shahridan Shahrisabz tumaniga qarab yurishda yo‘l ustida joylashgan “Yangi hilol” mahallasi Beklar dahasida yashovchi aholi 10 yildan beri mahallada elektr toki uchun talabga javob beradigan ustunlar qo‘yilmaganini aytadi.
“60 ta xo‘jalikka mo‘ljallangan transformatordan 180 dan ortiq xonadon foydalanamiz, elektr toki kuchlanishi juda past, — deydi Farid Mutallipov. — Qolaversa, yo‘l muammosi ham bor. Qor va yomg‘irli kunlarda yurib bo‘lmay qoladi”.
“Transformator muammosi haqida Qashqadaryo hududiy elektr tarmoqlari korxonasi mas’ullariga murojaat qildik, ammo ‘qilib beramiz’dan nariga o‘tishmayapti, — deydi Davron Ro‘ziyev. — Mahallamizdagi xonadonlarga kirib kelayotgan elektr simlarini ko‘rsangiz, qo‘rqib ketasiz. Shu darajada chalkash va qo‘rqinchli. Ammo mas’ullar bunga e’tibor ham bermayapti”.
Mahalla ahlining ta’kidlashicha, viloyat soliq boshqarmasi boshlig‘i o‘tkazgan sayyor qabulda ushbu muammo haqida aytmoqchi bo‘lganlarni Qashqadaryo hududiy elektr tarmoqlari korxonasi mas’ullari to‘xtatib, tez orada hal qilishini aytgan. Biroq qabuldan so‘ng muammoga e’tibor ham qaratilmagan.
“Qashqadaryo hududiy elektr tarmoqlari korxonasi boshlig‘iga ham, o‘rinbosariga ham muammomizni aytdik, mahalla ichkarisiga kirishda elektr sim uchun tayanch ustun yo‘qligini, aholi o‘rnatib qo‘ygan yog‘och ustunlar bolalar hayoti uchun xavfli ekanligini tushuntirdik. Shunday bo‘lsa-da, muammoga e’tibor yo‘q”, — deydi Bobonazar Murtazoyev.
Aytilishicha, mahallada yashovchi maktab o‘quvchilari kechki payt telefon yorug‘ida dars tayyorlaydi.
“Elektr toki pastligi sabab kechki payt dars tayyorlayotgan bolalarimizga telefon fonarini yoqib tutib turamiz, bolalarimiz telefon yorug‘ida dars tayyorlaydi, — deydi Nigora Hakimova. — Chunki ‘svet’ yorug‘i pastligi sabab dars tayyorlab bo‘lmaydi”.
“Ayni kunda mahallamizning ichki ko‘chalaridan yurib ham bo‘lmaydi, boisi loy. Hatto mashina ham kirolmaydi. Maktab o‘quvchilari darsga borish uchun loyga botadi va o‘qituvchisidan gap eshitadi. Yo‘lga shag‘al to‘kuvchilar esa ichki yo‘llar qolib, mansabdorlar yashaydigan uylar yonini tekislaydi, — deydi aholi vakillari. — Mahallamiz Qarshi shahridagi ‘Otchopar’ mahallasiga kiradi deyilgan. O‘tgan yili ‘Otchopar’ mahallasi ‘Obod mahalla’ davlat dasturi bo‘yicha ta’mirlandi. Ammo bizga e’tibor ham berishmadi. Raisdan sababini so‘rasak, men sizlarga faqat ma’lumotnoma berish vazifasini bajaraman, bu masalalarga javobgar emasman, deydi”.
Kuzatuvlarimizga ko‘ra, mahalladagi aksariyat yer uchastkalari chala qurilgan yoki umuman qurilish boshlanmagan holatda sotuvga qo‘yilgan.
“2009—2010-yillarda hokimlik tomonidan pala-partish berib yuborilgan yer uchastkalari qarovsiz holatda yotibdi. Yer egalari bu yerdan uy qurmaydi, yerni sotish maqsadida olgan, — deydi To‘ychi Do‘stqobilov. — Har o‘nta yer uchastkasidan to‘qqiztasi sotiladi. Yer sotib tadbirkorlik qilishyapti. Holbuki, ushbu hududdan yer so‘rab hokimlikka borgan odamga yer yo‘q degan javob beriladi. Biz yer uchastkasi sotilishiga qarshimasmiz, mayli, sotishsin. Ammo kimdir kelib yashasin shu yerda. Aholi ko‘paysa, mahalladagi shart-sharoit ham yaxshilanardi”.
Mahalla ahlining ta’kidlashicha, mahallada 100 dan ortiq sotiladigan yer uchastkasi mavjud.
“Yer kerakmas bo‘lsa, kerakli odamga berishsin. Uy-joy qurib yashayman degan muhtojga berishsin, — deydi mahalla ahli. — Mahallaning egasi yo‘q-da, bu yerdagi holat hech kimni qiziqtirmayapti. 10 yildan beri sotiladi deb yozib qo‘yilgan yerlarni zaxiraga qaytarib, auksion orqali muhtoj odamlarga sotishsin”.
“55 yoshga kirdim, 10 yildan beri shu ahvolda yashayapmiz, — deydi To‘ychi Do‘stqobilov. — Qachon mahallamizga egalari ko‘chib keladi-yu, mahallamiz sharoiti yaxshilanadi deb o‘tib ketamizmi, qachon binoyidek yashaymiz?”
Izoh (0)