Ijtimoiy tarmoqlarda Andijon viloyati hokimi matbuot kotibi Mirzohid Botirovga tegishli ekani aytilayotgan yozishmalarning nusxasi (skrinshot) tarqaldi, deb yozadi “Xabar.uz”.
Unda Mirzohid Botirov o‘ziga tanish va ancha sinashta bo‘lgan boshqa foydalanuvchi bilan “dildan suhbat” qurgani anglashiladi. Haqorat-u uyatsiz gaplarga to‘la yozishmalarda gap aylanib, blogerlarga taqalgan paytda matbuot kotibi “...osmonga chiqayotgan blogerni joyini ko‘rsatib qo‘ygani”ni alohida ta’kidlab, “15 kunda mulla bo‘lgani”ga urg‘u beradi. Shuningdek, yozishmalarda o‘sha bloger “asakalik” ekani, “hokim tiq” degani uchun “tiqilgani”ni yozib bo‘lmas haqoratlar bilan bayon qilinadi.
Andijon viloyati hokimligi matbuot xizmati ushbu yozishma yuzasidan bayonot berdi.
“Facebook ijtimoiy tarmog‘ida ‘Yoshlar olami’ akkaunti bilan foydalanuvchi Mirzohid Botirovning ushbu akkaunti xakerlik hujumiga uchragan bo‘lib, Mirzohid Botirov 2020-yilning 8-fevral kuni ushbu holatlardan xabar topgan va shu kunning o‘zidayoq viloyat prokuraturasiga ariza bilan murojaat qilgan. Hozirda huquq-tartibot organlari tomonidan skrinshotdagi yozishmalar kim tomonidan olib borilganligiga aniqlik kiritilmoqda.
Ushbu xabarlar tafsiloti bo‘yicha qo‘shimcha ma’lumot taqdim etiladi”, — deyiladi hokimlik bayonotida.
Andijon viloyati prokuraturasi ham ushbu yozishma yuzasidan bayonot berdi.
“Ijtimoiy tarmoqlarda Andijon viloyati hokimi matbuot kotibi Mirzohid Botirovga tegishli ekani aytilayotgan yozishmalari yuzasidan tekshirish harakatlari o‘tkazilmoqda. Shu bilan birga, M.Botirovning murojaatida ko‘rsatilgan vajlar o‘rganilmoqda. Natijalari haqida qo‘shimcha ravishda xabar qilinadi.”, – deyiladi Andijon prokuraturasi bayonotida.
Izoh (0)