Қарши шаҳрининг шундоққина биқинида яшовчи маҳалла аҳли электр токи кучланиши пастлиги, маҳалладаги қўлбола симёғочлар болалар ҳаётига хавф солиши ҳамда йўлнинг абгорлигидан шикоят қилмоқда. Бу ҳақда «Дарё»га мурожаат қилган маҳалла аҳли 10 йилдирки на ҳоким, на прокурор, ИИБ бошлиғи-ю, солиқ раҳбари ҳам маҳалла тақдири билан қизиқмаганидан нолимоқда.
«Бир куни маҳаллада жанжал бўлиб қолди, Қарши шаҳар ИИБга қўнғироқ қилиб, профилактика инспекторини чақирсак, инспектор маҳалла бошига келиб, ‘Бу маҳалла шаҳар ҳудудига кирмайди’, дея қайтиб кетди. Қарши туман ИИБ профилактика инспектори ҳам мазкур маҳалла туман таркибига кирмайди, шунинг учун, бу муаммога биз аралашмаймиз, деб ишни эътиборсиз қолдирди. 10 йилдирки шундай аросатда яшаяпмиз, — дейди аҳоли вакилларидан бири Тўйчи Дўстқобилов. — Маҳалламиз ҳужжатда Қарши шаҳар ҳудудига кириши ёзилган. Аммо мутасаддилар бизнинг шаҳар ҳудудига киришимизни тан олишмайди. Шу сабаб ҳам маҳалламизга 4 та сектор раҳбаридан бирортаси келмаган».
Қарши шаҳридан Шаҳрисабз туманига қараб юришда йўл устида жойлашган «Янги ҳилол» маҳалласи Беклар даҳасида яшовчи аҳоли 10 йилдан бери маҳаллада электр токи учун талабга жавоб берадиган устунлар қўйилмаганини айтади.
«60 та хўжаликка мўлжалланган трансформатордан 180 дан ортиқ хонадон фойдаланамиз, электр токи кучланиши жуда паст, — дейди Фарид Муталлипов. — Қолаверса, йўл муаммоси ҳам бор. Қор ва ёмғирли кунларда юриб бўлмай қолади».
«Трансформатор муаммоси ҳақида Қашқадарё ҳудудий электр тармоқлари корхонаси масъулларига мурожаат қилдик, аммо ‘қилиб берамиз’дан нарига ўтишмаяпти, — дейди Даврон Рўзиев. — Маҳалламиздаги хонадонларга кириб келаётган электр симларини кўрсангиз, қўрқиб кетасиз. Шу даражада чалкаш ва қўрқинчли. Аммо масъуллар бунга эътибор ҳам бермаяпти».
Маҳалла аҳлининг таъкидлашича, вилоят солиқ бошқармаси бошлиғи ўтказган сайёр қабулда ушбу муаммо ҳақида айтмоқчи бўлганларни Қашқадарё ҳудудий электр тармоқлари корхонаси масъуллари тўхтатиб, тез орада ҳал қилишини айтган. Бироқ қабулдан сўнг муаммога эътибор ҳам қаратилмаган.
«Қашқадарё ҳудудий электр тармоқлари корхонаси бошлиғига ҳам, ўринбосарига ҳам муаммомизни айтдик, маҳалла ичкарисига киришда электр сим учун таянч устун йўқлигини, аҳоли ўрнатиб қўйган ёғоч устунлар болалар ҳаёти учун хавфли эканлигини тушунтирдик. Шундай бўлса-да, муаммога эътибор йўқ», — дейди Бобоназар Муртазоев.
Айтилишича, маҳаллада яшовчи мактаб ўқувчилари кечки пайт телефон ёруғида дарс тайёрлайди.
«Электр токи пастлиги сабаб кечки пайт дарс тайёрлаётган болаларимизга телефон фонарини ёқиб тутиб турамиз, болаларимиз телефон ёруғида дарс тайёрлайди, — дейди Нигора Ҳакимова. — Чунки ‘свет’ ёруғи пастлиги сабаб дарс тайёрлаб бўлмайди».
«Айни кунда маҳалламизнинг ички кўчаларидан юриб ҳам бўлмайди, боиси лой. Ҳатто машина ҳам киролмайди. Мактаб ўқувчилари дарсга бориш учун лойга ботади ва ўқитувчисидан гап эшитади. Йўлга шағал тўкувчилар эса ички йўллар қолиб, мансабдорлар яшайдиган уйлар ёнини текислайди, — дейди аҳоли вакиллари. — Маҳалламиз Қарши шаҳридаги ‘Отчопар’ маҳалласига киради дейилган. Ўтган йили ‘Отчопар’ маҳалласи ‘Обод маҳалла’ давлат дастури бўйича таъмирланди. Аммо бизга эътибор ҳам беришмади. Раисдан сабабини сўрасак, мен сизларга фақат маълумотнома бериш вазифасини бажараман, бу масалаларга жавобгар эмасман, дейди».
Кузатувларимизга кўра, маҳалладаги аксарият ер участкалари чала қурилган ёки умуман қурилиш бошланмаган ҳолатда сотувга қўйилган.
«2009—2010 йилларда ҳокимлик томонидан пала-партиш бериб юборилган ер участкалари қаровсиз ҳолатда ётибди. Ер эгалари бу ердан уй қурмайди, ерни сотиш мақсадида олган, — дейди Тўйчи Дўстқобилов. — Ҳар ўнта ер участкасидан тўққизтаси сотилади. Ер сотиб тадбиркорлик қилишяпти. Ҳолбуки, ушбу ҳудуддан ер сўраб ҳокимликка борган одамга ер йўқ деган жавоб берилади. Биз ер участкаси сотилишига қаршимасмиз, майли, сотишсин. Аммо кимдир келиб яшасин шу ерда. Аҳоли кўпайса, маҳалладаги шарт-шароит ҳам яхшиланарди».
Маҳалла аҳлининг таъкидлашича, маҳаллада 100 дан ортиқ сотиладиган ер участкаси мавжуд.
«Ер керакмас бўлса, керакли одамга беришсин. Уй-жой қуриб яшайман деган муҳтожга беришсин, — дейди маҳалла аҳли. — Маҳалланинг эгаси йўқ-да, бу ердаги ҳолат ҳеч кимни қизиқтирмаяпти. 10 йилдан бери сотилади деб ёзиб қўйилган ерларни захирага қайтариб, аукцион орқали муҳтож одамларга сотишсин».
«55 ёшга кирдим, 10 йилдан бери шу аҳволда яшаяпмиз, — дейди Тўйчи Дўстқобилов. — Қачон маҳалламизга эгалари кўчиб келади-ю, маҳалламиз шароити яхшиланади деб ўтиб кетамизми, қачон бинойидек яшаймиз?»
Изоҳ (0)