“Ilhom” teatridan “Toshkentning umumiy manzarasini buzib turgan” binoni bo‘shatish so‘raldi. Teatr uchun bu “o‘limga teng” iltimos
Toshkentdagi Shodlik Palace mehmonxonasini xususiylashtirib olgan Ofelos Plaza kompaniyasi “Ilhom” teatridan aprel oxiriga qadar binoni bo‘shatib qo‘yishni so‘radi. Davlat tomonidan 1976-yilda teatr asoschisi marhum Mark Vaylga ajratib berilgan makonning yo‘qotilishi, jamoa fikricha, teatr uchun o‘lim hukmining o‘qilishi bilan teng.
Ofelos Plaza kompaniyasining xatida ta’kidlanishicha, 2020-yilda Toshkentning Shayxontohur tuman hokimligi talabi bilan binoni to‘liq rekonstruksiya qilish ishlari boshlanadi. Bunga shahar markazida joylashgan yoqimsiz ko‘rinishdagi binoning tashqi qiyofasi poytaxtning umumiy manzarasini buzib turgani sabab qilib ko‘rsatilgan, deya xabar bermoqda “Gazeta.uz”.
Shodlik Palace mehmonxonasi 1994-yilda xususiylashtirilgan. O‘sha vaqtdagi mehmonxona egasi teatr bilan avtomatik ravishda 10 yilga uzaytirish sharti bilan 2023-yilgacha ijara shartnomasi imzolagan. Teatr binodan beg‘araz asosda foydalanib kelayotgan edi. 2017-yilda sud mehmonxonani xususiylashtirish to‘g‘risidagi qarorni bekor qilgan va bino yana davlat ixtiyoriga qaytarib olingan edi.
Binoning yangi egasi — Ofelos Plaza QK MChJ. Ochiq ma’lumotlarga ko‘ra, kompaniya 2019-yil 3-dekabrda ro‘yxatga olingan, ustav jamg‘armasi 1 milliard so‘mga teng. Faoliyat turi — turar joy bo‘lmagan binolarni ijaraga berish va boshqarish. Kompaniya rahbari — Albert Aradovskiy, muassislari — Ne’matullo Haydarov (75 foiz) va Olga Sharvina (25 foiz).
“Mark Vaylning ‘Ilhom’ teatri, bu — tijoriy teatr emas. Buni barcha tomoshabinlar biladi va tushunadi. U davlatdan mablag‘ olmagan va olmaydi ham. Yangi bino sotib olish va unda teatrni qayta tiklash uchun teatrning hech qanday mablag‘ va imkoniyatlari yo‘q. Teatrning yo‘qotilishi faqatgina ‘Ilhom’ sahnalari uchun yaratilgan barcha spektakl repertuarlarining, jumladan, Mark Vaylning afsonaviy spektakllarining yo‘qotilishini ham anglatadi”, — deyiladi teatr jamoasi bayonotida.
“Bugun ‘Ilhom’ butun dunyoga mashhur bo‘lgan zamonaviy san’at markazidir. U nafaqat teatrdagi insonlarga, balki musiqachilar, rassomlar, fotosuratchilar, xoreograflar, rejissorlarga ham hayot baxsh etmoqda, shahar madaniy muhitini barpo etib, uning aholisiga xizmat qilmoqda. Teatr san’ati studiyasiga noyob uslublarni o‘rganish uchun Yevropa va AQShdan talabalar keladi”, — deyiladi bayonotda.
“Ha, bugun bino xususiy mulkdorlarning qo‘lida. Biroq u jamoatchilik tomonidan, jamiyat puliga barpo etilgan. Xuddi shu jamiyat 1976-yilda uni ‘Ilhom’ga taqdim etgan edi. Teatr O‘zbekiston tarixida qiyin kunlarni boshdan kechirdi. 2007-yilda Mark Vayl fojiali tarzda halok bo‘ldi. Biroq biz doim kelajakka umid va ishonch ko‘zi bilan boqdik”, — deya ta’kidlaydi teatr xodimlari.
“Binoni navbatdagi mulkdorga berar ekan, hech kim noyob teatr taqdiri haqida o‘ylab ko‘rmadi. Bir necha yil muqaddam biz qurishni boshlagan yangi mamlakatda teatr uchun joy yo‘qligini tan olishdan qayg‘udamiz”, — deyiladi bayonotda.
“Biz shaharliklar va rasmiylarni Toshkent o‘zining eng yaxshi teatrlaridan biridan shunchaki voz kechib yuboradigan darajada ma’naviy va madaniy jihatdan boymi, deb so‘rashni xohlardik. Yangi mehmonxona yoki biznes markazi bunday qurbonlikka arziydimi? Biz yo‘q deb hisoblaymiz. ‘Ilhom’ shahrimiz uchun kerak. ‘Ilhom’ teatri taqdirini hal etish va Toshkentga u kerakmi, degan savolga javob berish vaqti keldi”, — deydi jamoa.
“Ilhom” O‘zbekiston hukumati, tomoshabinlar, jurnalistlar, diplomatlar va xalqaro hamjamiyatni teatrni saqlab qolishga chaqirgan. “Faqatgina sizning yordamingiz bilan buni ro‘yobga chiqara olamiz”, — deya ta’kidlanadi bayonotda.
12-fevral kuni soat 15:00 da “Ilhom” teatrida bo‘lib o‘tadigan matbuot anjumaga jurnalistlar, blogerlar va befarq bo‘lmagan fuqarolar taklif qilingan.
