“Korxonamizning asosiy maqsadi – bozorni xalqaro standart darajasiga olib chiqish, rivojlantirish, xaridorlar hamda tadbirkorlarga qulaylik yaratish”. “Tashkent Trade Center” (“Abu Saxiy”) bozoridagi tadbirkorlar bilan yuzaga kelgan tortishuvga munosabat bildirdi.
Bir necha kun avval ijtimoiy tarmoqlarda “Tashkent Trade Center” xususiy korxonasiga qarashli, xalq tilida “Mato bozori” deb ataluvchi, asosan mato sotishga mo‘ljallangan do‘konlarning egalari va sotuvchilarining bozor ma’muriyatidan noroziligi aks etgan xabarlar tarqalgan edi. Videoda bozor ma’muriyati do‘konlarni rekonstruksiya qilish bahonasida mulkni noqonuniy egallab olishga urinayotgani ko‘rsatilgandi.
Bozor ma’muriyati masalaga oydinlik kiritish maqsadida do‘kon egalari hamda sotuvchilarning xohish va istaklarini o‘rganib chiqib, natijalari bo‘yicha quyidagilarni ma’lum qiladi:
2019-yilning 14-noyabr kuni O‘zbekiston Respublikasi FVV YoXBB Toshkent shahar Yong‘in xavfsizligi boshqarmasi tomonidan 1-blok hududida joylashgan savdo do‘konlarining yong‘inga qarshi holati o‘rganilib, yong‘in sodir bo‘lishiga sabab bo‘luvchi bir qancha kamchiliklar aniqlangan. Mazkur holatni oldini olish maqsadida, 1-blok hududida rekonstruksiya ishlarini amalga oshirish zaruriyati to‘g‘risida “Tashkent Trade Center”ga xulosa taqdim etgandi.
Quyida Yong‘in xavfsizligi boshqarmasi tomondan aniqlangan kamchiliklar keltirilgan:
– savdo do‘konlarida mavjud bo‘lgan yong‘inni avtomatik ravishda sezish va xabar berish qurilmasining issiqlikka ishlovchi IP-103 rusumli sezgichlari yangi, ya’ni tutunni sezuvchi sezgichlarga almashtirilmagani;
– ayrim tadbirkorlar tomonidan savdo do‘konlari ichida o‘zboshimchalik bilan qayta ta’mirlash ishlari o‘tkazilib, do‘konlar yonuvchi to‘siq devorlar bilan bo‘lingani;
– savdo do‘konlarining yong‘inga bardoshliligi 2-darajadan past bo‘lmasligi talab etilsada, pavilyonda mavjud bo‘lgan 796-ta savdo do‘konlaridan 667 tasi yuk tashish uchun mo‘ljallangan konteynerlardan kurilganligi;
– savdo do‘konlarining elektr ta’minoti yer osti uslubida o‘tkazilmasdan, tomdan, yonuvchi bog‘otlar orqali o‘tkazilib, simlarda avariya holatlari mavjudligi kabi yigirmaga yaqin kamchiliklar aniqlangan.
Bu kabi kamchiliklar bartaraf etilmasa yong‘in sodir bo‘lishiga, uni keng maydonga tarqalishiga, ko‘p miqdorda moddiy zarar ko‘rlishi va insonlarni sog‘lig‘i va hayotiga xavf keltirishi kabi nohush hodislarga olib kelish ehtimoli yuqoriligi aytilgan.
Shu sababli yong‘in xavfsizligini ta’minlashga qaratilgan choralar bajarilgunga qadar 1-blok savdo do‘konlarini ish faoliyatini vaqtincha to‘xtatish va qayta rekonstuksiya qilish masalalari ko‘rib chiqilishi maqsadga muvofiqligi ta’kidlangan.
Yuqorida keltirilgan muammolar avvaldan korxonada doimiy faoliyat olib boruvchi “Yong‘in xavfsizligi bo‘limi” tomonidan ham 1996/1997-yillarda, 700 ga yaqin temir konteynerlardan 14-15 m2 hajmdagi barpo etilgan 1-blok hududidagi savdo do‘konlarini muntazam o‘rganishi mobaynida ta’kidlab o‘tilgan kamchiliklar o‘z tasdig‘ini topgan. Masalan, do‘konlar orasi va tom qismida matolardan chiqqan mayda iplar yig‘ilib qolgan. Matolarning 90 foizi sintetika, yonish xususiyati juda tez. Oddiy uchqun chiqib ketsa ham, yong‘inni to‘xtatish imkoniyati juda past bo‘ladi. Shuningdek, tom bilan do‘konlar orasi 50 santimetr bo‘lgani uchun yong‘in vaqtida u yerga kirish imkoni bo‘lmaydi.
Bundan tashqari, yoz kunlari bozor hududida xarakatlanish juda qiyin. Bir tomondan havoning issib ketishi, yana bir tomondan do‘konlarga o‘rnatilgan sovutgichlarning issig‘i yo‘laklarga uradi. Umumiy sovutish va isitish tizimi yo‘q. Bular haqida tadbirokrlarga mutaxassislar bir necha marotaba tushuntirish bergan.
Ushbu muammolarni hal qilish choralarini ko‘rish uchun masalani investorlar oldiga qo‘yilganida, ular “bo‘ldi, bizni asosiy maqsadimiz do‘kondorlarga xavfsizlikni to‘laligicha ta’minlab berish” degan javobni aytib, “Mato bozori”dagi do‘konlarni buzib, o‘rniga yangidan zamon talablariga to‘la javob beradigan majmua qurish topshirig‘i ham berilgan. Shu bilan birga, 1-blok hududini qayta qurib bitkazish ishlari rejalashtirilishi jarayonida, yangi barpo etilgan savdo majmuasining pastki qavatidan aynan 1-blok mulkdorlari, toki o‘zlarini do‘konlari o‘rniga yangi do‘kon qurib bitkazib, o‘zlariga qayta topshirgunga qadar (taxminan 1-1,5 yil muddatni o‘z ichiga oladi) vaqtincha foydalanib turishlari uchun 18-20 m2 hajmdagi do‘konlar qurildi. 1-blok hududini vaqtincha ko‘chirish ishlarida sig‘im yuzasidan muammo kelib chiqmasligi uchun mazkur do‘konlarni korxona tomonidan sotish yoki ijaraga berish ishlari umuman amalga oshirilmadi.
Do‘kon egalari ham, “Mayli, do‘konlarimizni rekonstruksiya qilib, yana o‘zimizga o‘ringa-o‘rin berilsa rozimiz”, – degan fikrni aytgandi.
Bir muddat avval, yangi, zamonaviy talablarga javob beradigan 700 ta do‘konni o‘z ichiga olgan majmuani qurib bitkazdik. Majuma yerto‘lasini avtomashinalar turargohi qilmoqchi edik. Biroq, “Mato bozor”ni rekonstruksiya qilishimizni o‘ylab, yer to‘lani do‘konlarga aylantirdik. Yer to‘la deganda, biz bilgan va hayolga keltiradigan “podval” emas, aksincha, barcha qulayliklarga ega — umumiy issitish va sovutish tizimi hamda boshqa sharoitlari mavjud bo‘lgan shinam do‘konlar joylashgan joy nazarda tutilmoqda. U yerda joylashgan do‘konlarning barchasida savdo qilish uchun qulayliklar yaratilgan. Keng va yorug‘, yuklarni tashish uchun qulay liftlar, eskalatorlar ishga tushirilgan. Ana shu yerto‘ladagi do‘konlardan “Mato bozor”da ishlayotgan tadbirkorlarga vaqtinchalik bermoqchi bo‘ldik. Yangi majmua ishga tushgandan so‘ng, qaysi tadbirkor qaysi qatorda va qaysi joyda savdo qilayotgan bo‘lsa o‘sha joydan do‘kon ajratishni taklif qildik.
Korxona ma’muriyati 1-blokdagi “konteyner do‘konlar”ning ish faoliyatini vaqtincha to‘xtatib, ularni qayta rekonstruksiya qilish masalalarini ko‘rib chiqayotgani va tegishli takliflar o‘rganilayotganligi haqida mulkdorlarni oldindan ogohlantirildi.
Keyinchalik “Mato bozor”idagi mulkdorlarga bu taklifni aytganimizda negadir ular yer to‘ladagi do‘konlarga vaqtincha ko‘chib o‘tishni istashmadi. Tadbirkorlardan nima uchun bunga rozi bo‘lmayotganligini so‘raganimizda turlicha izoh berishdi. Masalan, do‘konlarni bosqichma-bosqich qurishni, ya’ni avval 10 ta do‘konni qurib bitkazib, keyin qolganlariga o‘tishni taklif qilishdi. Lekin buning iloji yo‘q, sababi majmuani bitta bino qurilishi aniq bir tizim asosida quriladi. Bu ko‘pchilikka ma’lum.
Yana bir takliflardan biri: yerto‘ladagi do‘konlarni ham, o‘zlarining eski joylarini ham bir yil davomida foydalanib turishga berish va bu orqali xaridorlarni yangi joyga o‘rgatish bo‘ldi. Bundan tashqari, mulkdorlardan boshqa ko‘plab takliflar tushdi. Hozirda biz bu takliflarni o‘rganib chiqmoqdamiz.
“Mato bozor”ni qayta qurib bitkazish uchun bir yil vaqt ketishini hisobga olib ular bilan shartnoma imzolamoqchi edik. Biz ularni “bunga qo‘l yo‘q”, deb majburlamoqchi emasmiz, albatta. Birinchi galda ularga shartnomani beramiz, istalgan huquqshunos bilan maslahat qilib olishlari mumkin. Shartnomadan agar biror bandini olib tashlash yoki o‘zgartirish kiritmoqchi bo‘lishsa, buni ham birgalikda o‘ylab ko‘rib – kelishamiz. Agar bizni ham qo‘limizdan keladigan ish bo‘lsa, ikki tomonlama qo‘l qo‘yamiz.
Shuni ta’kidlash joizki, korxona tomonidan ilgari surilgan 1-blokni rekonstruksiya kilish ishlari aynan bozor hududida olib borilayotgan kurilish ishlari doirasida bir yo‘la amalga oshirilishini istagan edik. Chunki, ma’lumki, kurilish uchun jalb etiladigan korxonamizga tegishli maxsus texnika va anjomlarni safarbar etish qulay imkoniyat edi. Endilikda esa, investor kompaniyamiz tomonidan Toshkent shahri hamda viloyatlarda bir qancha qurilish loyihalari amalga oshirilayotganligini hisobga olgan holda, mazkur qurilish texnikalarini ushbu yo‘nalishlarga jalb etdik. Bundan aytish mumkinki, 1-blok tadbirkorlari, biz tomondan taqdim etilgan takliflarga norozi munosabat bildirishgan ekan, biz ularni fikrlarini so‘zsiz qo‘llab quvvatlaymiz va erkin savdo faoliyatini olib borishlari tarafdorimiz. Xulosa o‘rnida, shuni aytish mumkinki, 1-savdo blokini buzish rejasini to‘xtatdik!
Hamma tadbirkorlarga ishlash uchun hamisha ochiqmiz. Qanday takliflari bo‘lsa, bajonidil eshitishga, madaniyat bilan gaplashib bir to‘xtamga kelish tarafdorimiz. Bizning asosiy maqsadimiz – bozorni rivojlantirish, xaridorlarga va sotuvchilarga qulaylik yaratish.
“Tashkent trade center“ xususiy korxonasi rasman shuni ma’lum qiladiki, Prezidentimiz Shavkat Mirziyoyev boshchiligida tadbirkorlar uchun yaratilayotgan keng imkoniyatlarni qo‘llab-quvvatlaymiz. Tadbirokrlar uchun qanday holatda erkin savdo qilish qulay bo‘lsa, shu sharoitni yaratib berishga tayyormiz.
Reklama huquqi asosida.
Izoh (0)