O‘zbekistonda aholining xarid qobiliyati pasaygani qayd etildi

Markaziy bank O‘zbekiston aholisi va korxonalarining inflyatsion kutilmalari — 2019-yil IV choragi bo‘yicha sharhni e’lon qildi.

O‘tkazilgan so‘rov natijalari, 2019-yilning IV choragida aholi daromadlari oshishiga qaramasdan, xarid qobiliyati pasayganini ko‘rsatdi. Xususan, mazkur davrda respondentlarning 76 foizi daromadi oshganini qayd etdi (2018-yil IV choragida  — 70 foiz). Biroq daromadi inflyatsiya darajasidan past darajada oshganini qayd etganlarning ulushi 43 foizgacha o‘sdi.

Aholining daromadi oshishi bilan bog‘liq kutilmalari biroz pasayish kuzatildi. O‘rta muddatli istiqbolda daromadlari o‘sishini kutayotgan respondentlarning ulushi 2 foiz bandga qisqarib, 75 foizni tashkil qildi.

Tadbirkorlarning kelgusidagi ish haqi bilan bog‘liq kutilmalarida keskin o‘zgarishlar qayd etilmadi. Ularning asosiy ulushi (47 foizi) ish haqini 10-20 foizga oshishini kutmoqda.

2019-yilning IV choragida aholining jamg‘arish kayfiyatida sarflashga bo‘lgan ehtiyojning tobora o‘sishi kuzatildi. Mazkur davrda respondentlar tomonidan hozirgi vaqt yirik xaridlar uchun qulay fursat ekanligi tez-tez ta’kidlab o‘tildi (yil boshida 11 foizdan yil oxiriga 16 foizgacha o‘sish).

Shuningdek, jamg‘armalarini tadbirkorlikka ishlatishini qayd etgan respondentlarning ulushi 42 foizgacha qisqardi. Bu, asosan, joriy inflyatsiya hamda iqtisodiyotdagi noaniqliklar yuqoriligi ta’sirida shakllandi.