Farg‘ona ko‘chalarida maxsus radarlar bilan jihozlangan patrul avtomashinalari harakatlanishni boshladi. Ular yo‘l-yo‘lakay belgilangan tezlikka amal qilmagan transport vositalarini aniqlaydi, deb xabar bermoqda “Daryo” muxbiri Azizjon Ermatov.
Ma’lum qilinishicha, Farg‘ona viloyati IBB Yo‘l harakati xavfsizligi boshqarmasi xodimlariga harakatlanish vaqtida belgilangan tezlikka amal qilmagan transport vositalarini aniqlovchi multiradar qurilmasi bilan jihozlangan 5 ta Nexia-3 avtomobillari topshirilgan.
Bundan tashqari, yo‘l-patrul xizmati inspektorlariga Tracker, Gentra, Cobalt, Nexia-3 kabi 9 ta yangi xizmat avtomobillari ham berilgan.
Qayd etilishicha, mazkur xizmat avtomashinalari to‘liq aloqa vositalari, birinchi tibbiy yordam ko‘rsatish uchun zarur dori-darmonlar va tibbiy uskunalar, favqulodda holatlarda foydalanish uchun qaychi, lom, yoritgich, yo‘l transport hodisasi ro‘y berganda hududni chegaralovchi maxsus belgilar bilan ta’minlangan.
Shuningdek, YHXB xodimlari 3 dona ko‘chma va 2 dona statsionar fotoradar qurilmalarini qabul qilib olishdi. Ayni paytda viloyat YHXB tasarrufida bu kabi radarlar soni 9 taga etgan.
Ma’lum bo‘lishicha, mazkur turdagi ko‘chma radarlar tomonidan 2019-yil oxiriga qadar 150 192 ta qoidabuzarlik holati qayd etilgan. Shu asosda 59 milliard 61 million so‘m jarima belgilangan. Belgilangan jarimalarning 41 milliard 60 million so‘mi undirilgan.
Izoh (0)