Oliy ta’lim tashkilotlarining ta’lim faoliyatini yanada takomillashtirish chora-tadbirlari to‘g‘risida O‘zbekiston Respublikasi Prezidentining tegishli qarori loyihasi jamoatchilik muhokamasiga qo‘yildi.
Loyihaga ko‘ra Vazirlar Mahkamasi huzuridagi Ta’lim sifatini nazorat qilish davlat inspeksiyasiga quyidagi topshiriq va vazifalar yuklatiladi:
ta’lim faoliyatiga litsenziya berilgan oliy ta’lim tashkilotlari va qo‘shma fakultetlar ro‘yxatini o‘z rasmiy veb-saytiga joylashtiradi hamda doimiy yangilab borilishini ta’minlaydi;
har o‘quv yilida xorijiy oliy ta’lim tashkilotlari va qo‘shma fakultetlarning pedagog xodimlari va talabalari o‘rtasida ta’lim jarayonining tashkil etilishi va sifatini aniqlashga oid anonim so‘rovnomalar o‘tkazadi hamda so‘rovnomalar natijalarini tahlil qilgan holda ta’lim sifatini oshirish bo‘yicha takliflar ishlab chiqadi.
Shunday tartib o‘rnatiladiki, unga ko‘ra:
qo‘shma ta’lim dasturlari va fakultetlar oliy ta’lim tashkilotida mavjud bo‘lgan ta’lim yo‘nalishlari va mutaxassisliklari negizida tashkil etilishi mumkin, lekin mavjud ta’lim yo‘nalishlari va mutaxassisliklariga mos bo‘lgan qo‘shma ta’lim dasturlari va fakultetlar tashkil etishga yo‘l qo‘yilmaydi;
qo‘shma ta’lim dasturlari va fakultetlarda ta’lim olayotgan talabalarning o‘qishini boshqa ta’lim yo‘nalishlari va mutaxassisliklarga ko‘chirish taqiqlanadi.
Shuningdek, loyihada Bosh prokuraturaga xorijiy ta’lim muassasalariga kiritish maqsadida pul mablag‘larini yoki boshqa mol-mulkni jalb etishga doir noqonuniy faoliyat, shuningdek, nodavlat oliy ta’lim xizmati ko‘rsatish faoliyati bilan litsenziyasiz shug‘ullanishga yo‘l qo‘ymaslik sohasidagi qonun hujjatlariga rioya etilishi yuzasidan nazoratni kuchaytirish va qonunga zid holatlar aniqlanganda esa aybdor shaxslarga nisbatan tegishli javobgarlik choralarini qo‘llash vazifasi yuklangan.
Mavzuga doir:
Izoh (0)