Haydovchilarning malakasini oshirish tartibiga o‘zgartirish kiritish taklif qilindi

Ichki ishlar vazirligi “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida”gi Vazirlar Mahkamasi qarori loyihasini muhokamaga qo‘ydi.

Vazirlar Mahkamasining “Avtomototransport vositalari haydovchilarini tayyorlash, qayta tayyorlash va ularning malakasini oshirish tizimini takomillashtirish chora-tadbirlari to‘g‘risida” 2018-yil 23-fevraldagi 139-son qarori 3-bandining ikkinchi xatboshisi quyidagi tahrirda bayon etilishi mumkin:

• “yuridik shaxslarning transport vositalari haydovchilari, shu jumladan, yo‘lovchi yoki yuk tashish faoliyatini amalga oshiruvchi haydovchilar, avtotransport vositalarini qisqa muddatli ijara (prokat) va lizing asosida boshqarayotgan yakka tartibdagi tadbirkorlar va boshqa jismoniy shaxslardan tashqari – ikki yilda bir marta;”.

Ushbu xatboshining amaldagi tahriri quyidagicha:

• yuridik shaxslarga tegishli avtotransport vositalarini boshqarayotgan shaxslar, avtotransport vositalarini qisqa muddatli ijara (prokat) va lizing asosida boshqarayotgan yakka tartibdagi tadbirkorlar va boshqa jismoniy shaxslardan tashqari — ikki yilda bir marta.

Vazirlar Mahkamasining “Avtomototransport vositalari va shahar elektr transport vositalari haydovchilarini tayyorlash, qayta tayyorlash hamda ularning malakasini oshirish bo‘yicha nodavlat ta’lim xizmatlari ko‘rsatish faoliyatini litsenziyalash tartibini yanada takomillashtirish chora-tadbirlari to‘g‘risida” 2018-yil 31-maydagi 408-son qarori 5-ilovasida 6-band quyidagi tahrirda bayon etiladi:

• “6. Mulkchilik shaklidan qat’i nazar, barcha yuridik shaxslar o‘zlariga tegishli bo‘lgan avtomototransport vositalari va shahar elektr transporti vositalarining haydovchilarini, shu jumladan, yo‘lovchi yoki yuk tashish faoliyatini amalga oshiruvchi haydovchilarini malaka oshirish kurslariga yuboradilar va undagi ishtirokini ta’minlaydilar.”.

Amaldagi tahrir quyidagicha:

• Mulkchilik shaklidan qat’i nazar barcha yuridik shaxslar o‘zlariga tegishli avtomototransport vositalari va shahar elektr transporti vositalari haydovchilari malakasini oshirish kurslariga yuboradilar va unda ishtirokini ta’minlaydi.

Shuningdek, 15-banddagi “6 oy davomida keng qamrovli aprobatsiyadan o‘tgan” degan so‘zlar chiqarib tashlanadi.