Bek Air Olmaotadagi aviahalokatga boshqa bir samolyotning izi sabab bo‘lganini taxmin qilmoqda

Bek Air aviakompaniyasining Olmaotada halokatga uchragan Fokker 100 samolyotining qulashiga undan bir daqiqa avval uchib o‘tgan Airbus samolyoti qoldirgan iz sabab bo‘lgan bo‘lishi mumkin. Samolyot uchib o‘tishi natijasida havoda notekis oqim yuzaga keladi. Bu haqda aviakompaniyaning parvoz xizmati direktori Erik Saparov ma’lum qildi, deb yozmoqda “Kommersant”.

Erik Saparovning so‘zlariga ko‘ra, halokatning samolyotlar yo‘llari kesishishi oqibatida yuz berganligi haqidagi talqin Bek Air samolyoti havoga ko‘tarilishda o‘ng va chap qanotlar muvozanatini saqlashga uringani bilan tasdiqlanmoqda. Uning qayd etishicha, uchuvchilar so‘nggi daqiqalargacha uchib ketishga va mazkur tashqi ta’sirni yengishga uringan.

Aviakompaniyaning boshqa bir vakili Nurlan Jumasultanovning ma’lum qilishicha, Fokker 100 va Airbus parvozi o‘rtasidagi farq 1—2 daqiqani tashkil qilgan bo‘lishi kerak. Uning aytishicha, mazkur oraliqni 3—5 daqiqagacha uzaytirish kerak.

Halokat guvohlarining so‘zlariga ko‘ra, samolyot ko‘tarilish vaqtida balandlikni yo‘qotgan va aerodromning beton to‘sig‘ini urib o‘tib, ikki qavatli binoga urilgan. Qozog‘iston rasmiylari halokatning uchta sababini ko‘rib chiqmoqda: ekipaj xatosi, texnik nosozlik va navigatsiya xizmatining ishi.

Bek Air aviakompaniyasining samolyoti 27-dekabr, juma kuni Qozog‘iston mahalliy vaqti bilan tonggi soat 7 da halokatga uchragan. Layner bortida besh nafar ekipaj a’zosi, 93 nafar yo‘lovchi, jumladan, 89 nafar Qozog‘iston fuqarosi, ikki nafar Ukraina, bir nafar Qirg‘iziston va bir nafar Xitoy fuqarosi bo‘lgan. O‘zbekiston Tashqi ishlar vazirligi halok bo‘lganlar orasida o‘zbekistonliklar yo‘qligini bildirgan. Aviahalokat oqibatida 15 nafar odam, xususan, samolyot komandiri halok bo‘ldi. Rasmiy manbalar aviahalokat qurbonlari sonining 12 nafar ekanini ma’lum qilgan. Olmaotadagi turli tibbiyot muassasalariga jami 49 nafar odam yotqizilgan. Shavkat Mirziyoyev Olmaotadagi aviahalokat munosabati bilan Qozog‘iston prezidentiga ta’ziya bildirgan.