Bek Air Олмаотадаги авиаҳалокатга бошқа бир самолётнинг изи сабаб бўлганини тахмин қилмоқда

Bek Air авиакомпаниясининг Олмаотада ҳалокатга учраган Fokker 100 самолётининг қулашига ундан бир дақиқа аввал учиб ўтган Airbus самолёти қолдирган из сабаб бўлган бўлиши мумкин. Самолёт учиб ўтиши натижасида ҳавода нотекис оқим юзага келади. Бу ҳақда авиакомпаниянинг парвоз хизмати директори Эрик Сапаров маълум қилди, деб ёзмоқда «Коммерсантъ».

Эрик Сапаровнинг сўзларига кўра, ҳалокатнинг самолётлар йўллари кесишиши оқибатида юз берганлиги ҳақидаги талқин Bek Air самолёти ҳавога кўтарилишда ўнг ва чап қанотлар мувозанатини сақлашга урингани билан тасдиқланмоқда. Унинг қайд этишича, учувчилар сўнгги дақиқаларгача учиб кетишга ва мазкур ташқи таъсирни енгишга уринган.

Авиакомпаниянинг бошқа бир вакили Нурлан Жумасултановнинг маълум қилишича, Fokker 100 ва Airbus парвози ўртасидаги фарқ 1—2 дақиқани ташкил қилган бўлиши керак. Унинг айтишича, мазкур оралиқни 3—5 дақиқагача узайтириш керак.

Ҳалокат гувоҳларининг сўзларига кўра, самолёт кўтарилиш вақтида баландликни йўқотган ва аэродромнинг бетон тўсиғини уриб ўтиб, икки қаватли бинога урилган. Қозоғистон расмийлари ҳалокатнинг учта сабабини кўриб чиқмоқда: экипаж хатоси, техник носозлик ва навигация хизматининг иши.

Bek Air авиакомпаниясининг самолёти 27 декабрь, жума куни Қозоғистон маҳаллий вақти билан тонгги соат 7 да ҳалокатга учраган. Лайнер бортида беш нафар экипаж аъзоси, 93 нафар йўловчи, жумладан, 89 нафар Қозоғистон фуқароси, икки нафар Украина, бир нафар Қирғизистон ва бир нафар Хитой фуқароси бўлган. Ўзбекистон Ташқи ишлар вазирлиги ҳалок бўлганлар орасида ўзбекистонликлар йўқлигини билдирган. Авиаҳалокат оқибатида 15 нафар одам, хусусан, самолёт командири ҳалок бўлди. Расмий манбалар авиаҳалокат қурбонлари сонининг 12 нафар эканини маълум қилган. Олмаотадаги турли тиббиёт муассасаларига жами 49 нафар одам ётқизилган. Шавкат Мирзиёев Олмаотадаги авиаҳалокат муносабати билан Қозоғистон президентига таъзия билдирган.