O‘zbekistonda ta’lim tashkilotlari, pedagog xodimlar, ta’lim oluvchilar, ta’lim-tarbiya jarayoni va boshqa zarur axborotlar to‘g‘risida yagona ma’lumotlar bazasidan iborat axborot tizimi joriy etiladi. Bu haqda Vazirlar Mahkamasining tegishli qarori loyihasi Normativ-huquqiy hujjatlar loyihalari muhokamasi portalida e’lon qilindi.
Qarori loyihasida aytilishicha, 2018—2021-yillar uchun UNESCO va O‘zbekiston o‘rtasidagi o‘zaro hamkorlik bo‘yicha memorandumda Oliy ta’lim sohasida malakani tan olish bo‘yicha Osiyo—Tinch okeani mintaqaviy konvensiyasining (Tokio konvensiyasi) O‘zbekiston tomonidan ratifikatsiya qilinishi yuzasidan ustuvor maqsad belgilangan.
Tokio konvensiyasi chet davlatlarda pedagog xodimlar, tadqiqotchilar va talabalarning chegaralararo mobilligi masalasini siyosiy va amaliy jihatdan uyg‘unlashtirish imkoniyatlarini yaratishga qaratilgan hujjat bo‘lib, unga a’zo bo‘lishning asosiy shartlaridan biri a’zolikka da’vogar davlatda Milliy axborot markazi (National information center) tashkil etilishi hisoblanadi.
Vazirlar Mahkamasi huzuridagi Ta’lim sifatini nazorat qilish davlat inspeksiyasi, Oliy va o‘rta maxsus ta’lim vazirligi, Xalq ta’limi vazirligi hamda Maktabgacha ta’lim vazirligining ta’lim tashkilotlari, pedagog xodimlar, ta’lim oluvchilar, ta’lim-tarbiya jarayoni va boshqa zarur axborotlar to‘g‘risida yagona ma’lumotlar bazasini shakllantirishni o‘z ichiga olgan ta’lim sifatini ta’minlovchi “Uzluksiz ta’lim” axborot tizimini joriy etish to‘g‘risidagi takliflariga rozilik berilishi mumkin.
Axborot tizimini yaratish, joriy etish va kelgusida yuritishni muvofiqlashtirish maqsadida O‘zbekiston Davlat budjetidan moliyalashtiriladigan boshqaruv xodimlarining umumiy cheklangan soni 15 nafardan iborat Davlat inspeksiyasining “Uzluksiz ta’lim” milliy axborot markazi tashkil etiladi.
Markazning asosiy vazifalari axborot tizimiga ma’lumot kiritish bo‘yicha manfaatdor vazirliklar va idoralar hamda ularning hududiy bo‘linmalari bilan hamkorlik qilish, axborot tizimining muntazam tarzda onlayn ishlashini ta’minlash, ma’lumot kiritilishining tizimli monitoringini olib borish hamda ma’lumotlarni almashish jarayonini muvofiqlashtirish, xorijiy davlatlarning, shu jumladan, Tokio konvensiyasini ratifikatsiya qilgan davlatlarning milliy axborot markazlari bilan hamkorlikni yo‘lga qo‘yish va o‘zaro axborot almashishni ta’minlash hisoblanadi.
Axborot tizimida 1992-yil 1-yanvardan boshlab ta’lim tashkilotlari, pedagog xodimlar, ta’lim oluvchilar, ta’lim-tarbiya jarayoni va boshqa zarur axborotlar to‘g‘risidagi ma’lumotlar bazasi yaratiladi.
Qaror lohihasini muhokama qilish 2020-yilning 9-yanvariga qadar davom etadi.
Izoh (0)