Ўзбекистонда таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисида ягона маълумотлар базасидан иборат ахборот тизими жорий этилади. Бу ҳақда Вазирлар Маҳкамасининг тегишли қарори лойиҳаси Норматив-ҳуқуқий ҳужжатлар лойиҳалари муҳокамаси порталида эълон қилинди.
Қарори лойиҳасида айтилишича, 2018—2021 йиллар учун UNESCO ва Ўзбекистон ўртасидаги ўзаро ҳамкорлик бўйича меморандумда Олий таълим соҳасида малакани тан олиш бўйича Осиё—Тинч океани минтақавий конвенциясининг (Токио конвенцияси) Ўзбекистон томонидан ратификация қилиниши юзасидан устувор мақсад белгиланган.
Токио конвенцияси чет давлатларда педагог ходимлар, тадқиқотчилар ва талабаларнинг чегаралараро мобиллиги масаласини сиёсий ва амалий жиҳатдан уйғунлаштириш имкониятларини яратишга қаратилган ҳужжат бўлиб, унга аъзо бўлишнинг асосий шартларидан бири аъзоликка даъвогар давлатда Миллий ахборот маркази (National information center) ташкил этилиши ҳисобланади.
Вазирлар Маҳкамаси ҳузуридаги Таълим сифатини назорат қилиш давлат инспекцияси, Олий ва ўрта махсус таълим вазирлиги, Халқ таълими вазирлиги ҳамда Мактабгача таълим вазирлигининг таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисида ягона маълумотлар базасини шакллантиришни ўз ичига олган таълим сифатини таъминловчи «Узлуксиз таълим» ахборот тизимини жорий этиш тўғрисидаги таклифларига розилик берилиши мумкин.
Ахборот тизимини яратиш, жорий этиш ва келгусида юритишни мувофиқлаштириш мақсадида Ўзбекистон Давлат бюджетидан молиялаштириладиган бошқарув ходимларининг умумий чекланган сони 15 нафардан иборат Давлат инспекциясининг «Узлуксиз таълим» миллий ахборот маркази ташкил этилади.
Марказнинг асосий вазифалари ахборот тизимига маълумот киритиш бўйича манфаатдор вазирликлар ва идоралар ҳамда уларнинг ҳудудий бўлинмалари билан ҳамкорлик қилиш, ахборот тизимининг мунтазам тарзда онлайн ишлашини таъминлаш, маълумот киритилишининг тизимли мониторингини олиб бориш ҳамда маълумотларни алмашиш жараёнини мувофиқлаштириш, хорижий давлатларнинг, шу жумладан, Токио конвенциясини ратификация қилган давлатларнинг миллий ахборот марказлари билан ҳамкорликни йўлга қўйиш ва ўзаро ахборот алмашишни таъминлаш ҳисобланади.
Ахборот тизимида 1992 йил 1 январдан бошлаб таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисидаги маълумотлар базаси яратилади.
Қарор лоҳиҳасини муҳокама қилиш 2020 йилнинг 9 январига қадар давом этади.
Изоҳ (0)