AQSh moliya vaziri Stiven Mnuchin ayrim jurnalistlarning fikricha, jahon markaziy banklarida yetishmayotgan 1,5 trillion dollar naqd pul qayerga “g‘oyib bo‘lgani” haqidagi savolga javob berdi, deb yozmoqda “TASS”.
Qayd etilishicha, Fox News efirida Mnuchindan asosan 100 dollarlik kupyuralardan iborat 1,5 trillion dollar bosma pullar qayerga “yo‘qolganini” tushuntirib berishi so‘ralgan. Bunda boshlovchi nega aynan shuncha qiymatga to‘xtalganiga aniqlik kiritmagan.
“Ushbu 100 dollarlik kupyuralarning salmoqli qismi butun dunyo bo‘ylab bank yacheykalarida ayni ma’noda bo‘sh turibdi”, — degan Mnuchin.
Uning qo‘shimcha qilishicha, hamma qo‘lida dollar bo‘lishini xohlaydi, chunki AQSh valyutasi butun dunyoda zaxira maqomiga ega. Mnuchin dollarning muvaffaqiyatini AQShda pulni saqlash, investitsiya qilish va aktivlarga ega bo‘lish xavfsizligi bilan izohlagan.
Shu bilan birga, moliya vaziri Amerika dollariga talab ortib borayotganini ta’kidlagan.
Avvalroq bir qator nashrlar markaziy banklar har yili iqtisodiyotga 100 milliard dollargacha elektron pullarni muomalaga chiqarganda shu qiymatdagi naqd pul va qimmatbaho metallar muomaladan “yo‘qolib qolishi”ni yozgan.
AQSh Federal rezerv tizimi ma’lumotlariga ko‘ra, dunyoda 1 dollarlik kupyuralardan ko‘ra 100 dollarlik kupyuralar ko‘proq muomalada bo‘ladi. Taxminlarga ko‘ra, 2008—2009- yillardagi moliyaviy inqirozdan so‘ng dunyoda 100 dollarlik kupyuralar soni ikki barobar ortib, 1,3 trillion dollardan oshdi. Bunda Amerika Markaziy banki 100 dollarlik banknotalarning 80 foizi AQShdan tashqarida muomalada degan fikrda.
Izoh (0)