AQShning Viskonsin shtatida joylashgan Uosau shahri rasmiylari qorbo‘ron o‘ynashga 50 yil avval qo‘yilgan taqiqni qayta ko‘rib chiqishga qaror qildi. Bu haqda Meduza xabar berdi.
Qorbo‘ron o‘ynashni taqiqlovchi qonun 1962-yilda qabul qilingan. Unga ko‘ra, har qanday narsani, buyumni, o‘qni, toshni, qor bo‘lagini yoki anjomlarni biror boshqa kishiga uloqtirish taqiqlanadi.
Deyarli har yili qishki bayramlar mavsumida butun mamlakat bo‘ylab matbuotda Uosau haqida maqolalar chiqadi. Ularda jurnalistlar shaharda amalda bo‘lgan taqiqning ustidan kuladi. Bu safar Barstool Sports nashri xatolik sababli mazkur qonun “yaqinda” amaldagi mer tomonidan imzolanganini ta’kidlab, Uosauni “AQShning eng yomon shahri” deb atagach, shahar rasmiylarining sabr kosasi to‘ldi.
Shahar kengashidagi uzoq davom etgan majlisdan so‘ng, qonunni bekor qilishga qaror qilingan. Yuridik jihatdan qonun 2020-yil yanvar oyida bekor qilinadi. Mazkur majlisga deputatlardan biri qo‘lida bir bo‘lak qor bilan kelgan va uni butun zal bo‘ylab otgan, qor bo‘lagi esa politsiya boshlig‘ining noutbukiga borib tekkan.
Politsiya boshlig‘ining o‘rinbosari, o‘z navbatida, maxsus videomurojaat yozgan va unda qonun o‘z kuchida bo‘lsa ham, qo‘rbo‘ron o‘ynaganlik uchun hech kim jazolanmasligini va’da qilgan. Videomurojaat chog‘ida orqa tomonda xizmat formasidagi politsiyachilarning qorbo‘ron o‘ynayotganini mumkin. Videoning oxirida esa politsiya rahbari o‘rinbosari shahar merini qor bilan “o‘qqa tutgan”.
Shahar kengashi tomonidan qayd etilishicha, AQShning ko‘plab shaharlarida hech qachon amalda qo‘llanilmaydigan g‘alati mahalliy qonunlar mavjud. Ularning bekor qilinmasligiga esa ular haqida hech kim eslamasligi sabab bo‘ladi.
Izoh (0)