АҚШ молия вазири Стивен Мнучин айрим журналистларнинг фикрича, жаҳон марказий банкларида етишмаётган 1,5 триллион доллар нақд пул қаерга «ғойиб бўлгани» ҳақидаги саволга жавоб берди, деб ёзмоқда «ТАСС».
Қайд этилишича, Fox News эфирида Мнучиндан асосан 100 долларлик купюралардан иборат 1,5 триллион доллар босма пуллар қаерга «йўқолганини» тушунтириб бериши сўралган. Бунда бошловчи нега айнан шунча қийматга тўхталганига аниқлик киритмаган.
«Ушбу 100 долларлик купюраларнинг салмоқли қисми бутун дунё бўйлаб банк ячейкаларида айни маънода бўш турибди», — деган Мнучин.
Унинг қўшимча қилишича, ҳамма қўлида доллар бўлишини хоҳлайди, чунки АҚШ валютаси бутун дунёда захира мақомига эга. Мнучин долларнинг муваффақиятини АҚШда пулни сақлаш, инвестиция қилиш ва активларга эга бўлиш хавфсизлиги билан изоҳлаган.
Шу билан бирга, молия вазири Америка долларига талаб ортиб бораётганини таъкидлаган.
Аввалроқ бир қатор нашрлар марказий банклар ҳар йили иқтисодиётга 100 миллиард долларгача электрон пулларни муомалага чиқарганда шу қийматдаги нақд пул ва қимматбаҳо металлар муомаладан «йўқолиб қолиши»ни ёзган.
АҚШ Федерал резерв тизими маълумотларига кўра, дунёда 1 долларлик купюралардан кўра 100 долларлик купюралар кўпроқ муомалада бўлади. Тахминларга кўра, 2008—2009- йиллардаги молиявий инқироздан сўнг дунёда 100 долларлик купюралар сони икки баробар ортиб, 1,3 триллион доллардан ошди. Бунда Америка Марказий банки 100 долларлик банкноталарнинг 80 фоизи АҚШдан ташқарида муомалада деган фикрда.
Изоҳ (0)