Elektronika va maishiy texnika bozorida yetakchilardan biri bo‘lgan Qozog‘istonning Sulpak kompaniyasi O‘zbekistondagi vaziyatni diqqat bilan kuzatayotganini ma’lum qildi. Bu haqda Spot xabar bermoqda.
“Ushbu bozor rivojlanganligi va aholi ko‘pligi uchun katta salohiyatga ega. Hozirgi vaqtda O‘zbekiston Yevrosiyo iqtisodiy ittifoqi bilan yanada tig‘iz birikishi zarur”, — dedi kompaniya bosh direktori Dmitriy Provkin.
Uning aytishicha, O‘zbekiston qonunchiligida ayni paytda bozorga xorijiy kompaniyalar kirishini cheklovchi va mahalliy ishlab chiqaruvchilar manfaatini ko‘zlovchi bojxona talablari hamda aksizlar nuqtayi nazaridan qator cheklovlar mavjud.
“Integratsiyalashuv bilan bog‘liq jihatlar hal bo‘lishi bilan O‘zbekistonga kiramiz. Chunki Qozog‘iston va Qirg‘izistonda samarali ishlayotgan biznes-modelimiz O‘zbekiston bozorida ham ish beradi deb o‘ylaymiz. Yuz berayotgan o‘zgarishlardan xabardormiz va vaziyatni diqqat bilan kuzatyapmiz”, — ta’kidladi Provkin.
Ma’lumot uchun, Sulpak Qozog‘iston va Qirg‘izistondagi 55 ta aholi punktida 130 ta gipermarket va 21 ta aloqa ofislariga ega. Joriy yilda kutilayotgan tushum 320 milliard tengeni ( 800 million dollardan oshiq) tashkil etadi.
Izoh (0)