Xitoy xalq respublikasi harbiy dengiz floti suv osti kemasi AQShdagi har qanday nishonga yetib bora oladigan ballistik raketani sinovdan o‘tkazdi. Bu haqda The Washington Times nashri Pentagondagi manbalariga tayanib xabar tarqatgan.
Ma’lumotlarga ko‘ra, eng yangi JL-3 raketasining sinoviga 22-dekabr yakshanba kuni Sariq dengizning shimoli-g‘arbiy qismidagi Boxay ko‘rfazida Jin sinfiga kiruvchi atom suvosti kemasidan start berilgan.
Sinovni Amerika razvedka sun’iy yo‘ldoshlari payqagan va raketa parvozini turli nuqtalardan kuzatgan. Qurolning muvaffaqiyatli test qilingani yoki aksincha salbiy baho olgani yuzasidan qo‘shimcha ma’lumot berilmagan.
Pentagon Axborot xizmati vakili Devid Istbern ushbu raketa sinovi haqida ma’lumotga ega emasligini bildirgan. Nashrning yozishicha, Xitoy ushbu ballistik raketani AQSh KXDR uzoq masofaga uchadigan qurol sinovini kutayotgan vaqtida test qilgan bo‘lishi mumkin.
Izoh (0)