O‘tgan hafta davomida ob-havoning yomonlashgani sabab Qozog‘iston yo‘llaridan mingdan ortiq mashinalar tirbandlikda qolib ketdi, sodir bo‘lgan 104 ta YTH oqibatida 39 kishi halok bo‘ldi. Bu haqda ichki ishlar vaziri Yerlan Turgumbayevga tayanib, Tengrinews xabar berdi.
“Ob-havoning yomonlashgani sabab yo‘llardagi vaziyat qiyinlashmoqda. 11 ta viloyatda yo‘llar yopildi, jumladan, Turkiston, Olmaota, Qarag‘anda, Mang‘istov, Kostanay va hokazo. 16-dekabrdan 22-dekabrga qadar mamlakatda 104 ta YTH qayd etilgan bo‘lib, uning oqibatida 39 kishi halok bo‘lgan, 158 kishi turli tan jarohatlarini olgan”, — deydi vazir.
Yo‘llardagi bu kabi holatlarning paydo bo‘lishiga ob-havo sharoiti salbiy ta’sir ko‘rsatmoqda: haroratning nolga qadar keskin tushishi, muzlamalar yuzaga kelishi, uning ortidan tuman tushishi, shuningdek, yomg‘ir va qor yog‘ishi natijasida ko‘rishning cheklanishi deyarli barcha yo‘llarda avariyalarning ko‘payishiga olib kelgan.
Bundan tashqari, ko‘plab haydovchilar nosoz avtoulovlar, yozgi shinalar bilan aylanma yo‘llar orqali yopiq hududlarga kirib ketmoqda.
“Olmaota viloyatidagi ‘Olmaota—Shinjar’ avtomobil yo‘lida MAN yuk mashinasining haydovchisi muzlamada yo‘lni bo‘lib turuvchi to‘siqqa urilib, qarama-qarshi tarafga chiqib ketgan. Natijada YTH sodir bo‘lgan joyda tirbandlik yuzaga keldi, yo‘lda 15 ga yaqin yuk mashinalari to‘planib qoldi, ular beshta transport vositasi ishtirokida yana ikkita avtohalokatga olib keldi, oqibatda ikki kishi halok bo‘ldi va ikkitasi jarohatlandi. Xuddi shunday holat Aqto‘be viloyatida ham bo‘lgan. U yerda muzlama va ko‘rish cheklangan joyda 12 avtomobil ishtirokida baxtsiz hodisa yuz bergan edi”, — deydi Yerlan Turgumbayev.
Mavzuga doir: TIV Aqto‘beda 50 nafar o‘zbekistonlik buzilib qolgan avtobusdan evakuatsiya qilinganini tasdiqladi
Izoh (0)