Polsha Tashqi ishlar vazirligi Rossiya prezidenti Vladimir Putinning Ikkinchi jahon urushi boshlanishiga oid so‘zlariga “xavotir va ishonchsizlik bilan” munosabat bildirdi. Bu haqda Meduza xabar bermoqda.
Polsha TIVda ta’kidlanishicha, Putinning so‘zlarida voqealar noto‘g‘ri talqin qilingan. Vazirlik prezidentning so‘zlarini keyinchalik Iosif Stalinning vorisi Nikita Xrushchev tomonidan qoralangan “Stalin totalitarizmi davridagi targ‘ibot xabarlariga” o‘xshatgan.
“Rossiya prezidentining so‘zlari Polsha va Rossiya mutaxassislarining birgalikdagi faoliyatini, shuningdek, Polsha—Rossiya munosabatlarida haqiqat va yarashish yo‘lini topishga uringan o‘zlaridan oldingi Mixail Gorbachyov va Boris Yelsinning yutuqlariga putur yetkazadi”, — deyiladi Polsha TIV bayonotida.
Polshaning rasmiy pozitsiyasi bu 1939-yil sentabr oyida SSSR Germaniya singari Polshaga hujum qilgani haqidagi tezis hisoblanadi. Vladimir Putin 19-dekabr kuni sovet qo‘shinlari Polshaga mamlakat rasmiylari “Polsha—Ruminiya” chegarasida bo‘lgan paytda kirgan deb aytgan. Shuningdek, Putin SSSR Germaniya bilan tajovuz qilmaslik to‘g‘risidagi bitmni oxirgi bo‘lib imzolagani va Polsha bundan avval Chexoslovakiyani bo‘lishda ishtirok etganini aytgan.
Xabarda aytilishicha, Polsha Vladimir Putinni Ikkinchi jahon urushi boshlanganining 80 yilligi munosabati bilan o‘tkaziladigan tadbirlarga taklif qilmadi. Polsha bosh vaziri o‘rinbosari Yatsek Sasin bu holatni Putinni “qo‘shni davlatlarga qarshi qurolli tajovuzdan foydalanadigan mamlakat yetakchisi” deb qaragani bilan izohlagan.
Izoh (0)