Ўтган ҳафта давомида об-ҳавонинг ёмонлашгани сабаб Қозоғистон йўлларидан мингдан ортиқ машиналар тирбандликда қолиб кетди, содир бўлган 104 та ЙТҲ оқибатида 39 киши ҳалок бўлди. Бу ҳақда ички ишлар вазири Ерлан Тургумбаевга таяниб, Tengrinews хабар берди.
«Об-ҳавонинг ёмонлашгани сабаб йўллардаги вазият қийинлашмоқда. 11 та вилоятда йўллар ёпилди, жумладан, Туркистон, Олмаота, Қарағанда, Манғистов, Костанай ва ҳоказо. 16 декабрдан 22 декабрга қадар мамлакатда 104 та ЙТҲ қайд этилган бўлиб, унинг оқибатида 39 киши ҳалок бўлган, 158 киши турли тан жароҳатларини олган», — дейди вазир.
Йўллардаги бу каби ҳолатларнинг пайдо бўлишига об-ҳаво шароити салбий таъсир кўрсатмоқда: ҳароратнинг нолга қадар кескин тушиши, музламалар юзага келиши, унинг ортидан туман тушиши, шунингдек, ёмғир ва қор ёғиши натижасида кўришнинг чекланиши деярли барча йўлларда аварияларнинг кўпайишига олиб келган.
Бундан ташқари, кўплаб ҳайдовчилар носоз автоуловлар, ёзги шиналар билан айланма йўллар орқали ёпиқ ҳудудларга кириб кетмоқда.
«Олмаота вилоятидаги ‘Олмаота—Шинжар’ автомобиль йўлида MAN юк машинасининг ҳайдовчиси музламада йўлни бўлиб турувчи тўсиққа урилиб, қарама-қарши тарафга чиқиб кетган. Натижада ЙТҲ содир бўлган жойда тирбандлик юзага келди, йўлда 15 га яқин юк машиналари тўпланиб қолди, улар бешта транспорт воситаси иштирокида яна иккита автоҳалокатга олиб келди, оқибатда икки киши ҳалок бўлди ва иккитаси жароҳатланди. Худди шундай ҳолат Ақтўбе вилоятида ҳам бўлган. У ерда музлама ва кўриш чекланган жойда 12 автомобиль иштирокида бахтсиз ҳодиса юз берган эди», — дейди Ерлан Тургумбаев.
Мавзуга доир: ТИВ Ақтўбеда 50 нафар ўзбекистонлик бузилиб қолган автобусдан эвакуация қилинганини тасдиқлади
Изоҳ (0)