Bosh prokuratura Oliy Majlis Qonunchilik palatasi, viloyat, tuman va shaharlar kengashlari deputatligiga joriy yilning 22-dekabr kuni bo‘lib o‘tgan saylovlarga hokimiyat organlarining aralashuvi yuzasidan kelib tushgan murojaatlar o‘rganilganini ma’lum qildi.
Bosh prokuratura tomonidan xabar berilishicha, ijtimoiy tarmoqlarda Koson tumani “Ayronchi” mahalla fuqarolar yig‘ini raisi — “Etak” 15-saylov okrugidan tuman xalq deputatlari kengashiga o‘z nomzodini qo‘ygan G‘ayrat Boymirzayevdan o‘z nomzodini qaytarib olish haqida majburiy ravishda ariza yozdirib olingani haqida tarqalgan xabar tekshirilgan.
Aniqlanishicha, G‘ayrat Boymirzayev Xalq deputatlari Koson tumani kengashi deputatligiga nomzod sifatida ko‘rsatilgan bo‘lib, uning nomzodi saylov byulletenidan olib tashlanmagan va qonuniy ravishda saylovlarda deputatlikka nomzod sifatida ishtirok etgan.
Ma’lum qilinishicha, ijtimoiy tarmoqlarda Toshkent shahar Olmazor tumanidagi 10, 23 va 142-sonli saylov uchastkalari ishiga noqonuniy aralashish, jumladan, hokimlik mutasaddilari mahalla raislariga muayyan nomzodlarni qo‘llab-quvatlash haqida topshiriq berganligi bilan bog‘liq ma’lumotlar ham o‘rganilgan.
Ushbu holat bo‘yicha tekshirish o‘tkazilib, biron bir shaxs tomonidan yuqoridagi saylov uchastkalari ishiga noqonuniy aralashganlik holatlari tasdiqlanmadi.
Bosh prokuraturaning xabar berishicha, Toshkent shahar Yashnobod tumanida ovozlarni sanab chiqish bo‘yicha yakuniy bayonnoma nusxasini to‘ldirish va bayonnoma nusxalarini hech kimga tarqatmaslik yuzasidan g‘ayriqonuniy ko‘rsatma berilishi bilan bog‘liq ma’lumotlar tekshirilgan.
Mavzuga doir: Jurnalistlar Yashnoboddagi saylovlarda “chernovik” protokollardan foydalanish holatini voqea joyiga borib o‘rgandi (video)
Mazkur holat yuzasidan Bosh prokuratura tomonidan tergovga qadar tekshirish harakatlari o‘tkazilmoqda.
Bosh prokuratura tomonidan 22-dekabr kuni soat 22:00 da Telegram’da tarqalgan Sergeli tumanidagi saylov uchastkasida sodir qilingan qonun buzilish holatlari aks etgan videolavha ham tekshirilgan.
Aniqlanishicha, saylov uchastkasida saylov natijalari bo‘yicha ovozlarni sanoqdan o‘tkazish va hujjatlarni rasmiylashtirish jarayoniga nomzodlarning ishonchli vakillari va kuzatuvchilar kiritilmagan. Sanoqdan o‘tkazish alohida xonada amalga oshirilgan.
Mazkur holat yuzasidan 23-dekabr, dushanba kuni Jinoyat kodeksining 146-moddasi va 209-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Bosh prokuratura Uchtepa tumanida kuzatilgan saylovga aralashishi holatini ham o‘rgandi. Idoraning ma’lum qilishicha, O‘zbekiston Liberal demokratik partiyasi a’zosi Bobur Xolmatovning murojaati tekshirilgan.
Aniqlanishicha, Uchtepa tumani hokimligi tashkiliy-kadrlar guruhi rahbari Sherzod Nigmatov O‘zbekiston Ekologik partiyasi ichki ishlariga va saylov jarayoniga noqonuniy aralashgan.
Ta’kidlanishicha, Sherzod Nigmatov va partiyaning tuman kengashi raisi Q.Mahkamov Liberal demokratik partiya a’zosi Bobur Xolmatov, “Adolat” partiyasi a’zosi Hulkar Yunusova hamda 2017-yildan AQShda yashayotgan Sanobar Azimovaning nomzodini ularning roziligisiz va xabarisiz Ekologik partiyadan Xalq deputatlari Uchtepa tumani Kengashi deputatligiga nomzod sifatida ko‘rsatib, saylov hujjatlariga soxta ma’lumotlar kiritgan.
Mazkur holat yuzasidan 23-dekabr kuni Jinoyat kodeksining 146-moddasi va 209-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir: Saylovlarda qonunbuzilish holatlari bo‘ldi
Izoh (0)