AQShning CNN Travel nashri O‘zbekistonning so‘nggi yillarda sayohat uchun eng munosib davlatlar qatoridan joy olayotganiga izoh berdi. Bu haqda Turizmni rivojlantirish davlat qo‘mitasi xabar qildi.
Nashr tomonidan qayd etilishicha, O‘zbekiston madaniy va tarixiy jihatdan jozibali mamlakat bo‘lib, oson kirish va vizasiz sayohat qilish imkoniyati tufayli Lonely Planet sayyohlik veb-sayti tomonidan yangi yil uchun birinchi raqamli sayohatlar mintaqasi deya topilgan.
Ta’kidlanishicha, The Economist nashri ham mamlakatni alohida ta’riflab, o‘tgan yili hukumat tomonidan jadal sur’atlar bilan amalga oshirilgan islohotlari tufayli O‘zbekistonni 2019-yilning eng tezkor rivojlanayotgan mamlakat sifatida qayd etdi. Shularning bari hamda uning yetarlicha kashf qilinmagan tarixi va ajoyib taomlari O‘zbekistonni tobora ommalashib borayotgan sayohatbop manzilga aylantirmoqda.
Muallifning ta’kidlashicha, O‘zbekiston vizasiz sayohat qilish imkoni, xavfsizligi, boy tarixi, ijtimoiy tarmoqlarda ommalashib borayotgani va albatta, mazali milliy taomlari bilan 2020-yilda sayohat qilish uchun eng munosib o‘lka hisoblanadi.
Ta’kidlanishicha, xavfsizlik jihatidan ham O‘zbekiston ijobiy baholanib, mamlakatga tashrif buyuruvchi xorijliklar soni tobora oshib borayotgani qayd etilgan. Shuningdek, Markaziy Osiyo, xususan, O‘zbekistonning eng jozibali sifati minglar yillar davomida saqlanib kelingan tarixi ekanligiga alohida to‘xtalib o‘tilgan.
“UNESCO madaniy meros obyektlari uchun madaniy va tarixiy ahamiyatga ega bo‘lgan joylar va yo‘nalishlarni belgilab beradi. O‘zbekistondan bu ro‘yxatga Buxoro, Samarqand, Xiva va Shahrisabz shaharlari kiritilgan”, — deyiladi nashr izohida.
Bundan tashqari, CNN maqolasida so‘nggi yillarda ijtimoiy tarmoqlarda g‘arb sayohatchilari post ulashishlari orqali mamlakat va uning diqqatga sazovor joylari faol targ‘ib qilinayotgani ta’kidlanib, ularda #VisitUzbekistan, #VisitTashkent, #VisitSamarkand va #TravelCentralAsia kabi heshteglar keng tarqalayotganiga e’tibor qaratilgan.
O‘zbekistonning milliy oshxonasi haqida gap ketar ekan, aksariyat taomlarning xamir va guruchdan tayyorlanishi qayd etilgan. “Ularning eng mashhur taomi o‘zbek palovidir, tarkibi sabzi, guruch, piyoz, go‘sht va guruchdan iborat”, — deyiladi nashrda. Shu o‘rinda so‘nggi vaqtlarda oziq-ovqat blogerlarining O‘zbekistonga tashrifi va uning gastronomik turizm salohiyatini targ‘ib qilayotganligi haqida so‘z yuritilgan.
Izoh (0)