Бош прокуратура Олий Мажлис Қонунчилик палатаси, вилоят, туман ва шаҳарлар кенгашлари депутатлигига жорий йилнинг 22 декабрь куни бўлиб ўтган сайловларга ҳокимият органларининг аралашуви юзасидан келиб тушган мурожаатлар ўрганилганини маълум қилди.
Бош прокуратура томонидан хабар берилишича, ижтимоий тармоқларда Косон тумани «Айрончи» маҳалла фуқаролар йиғини раиси — «Этак» 15-сайлов округидан туман халқ депутатлари кенгашига ўз номзодини қўйган Ғайрат Боймирзаевдан ўз номзодини қайтариб олиш ҳақида мажбурий равишда ариза ёздириб олингани ҳақида тарқалган хабар текширилган.
Аниқланишича, Ғайрат Боймирзаев Халқ депутатлари Косон тумани кенгаши депутатлигига номзод сифатида кўрсатилган бўлиб, унинг номзоди сайлов бюллетенидан олиб ташланмаган ва қонуний равишда сайловларда депутатликка номзод сифатида иштирок этган.
Маълум қилинишича, ижтимоий тармоқларда Тошкент шаҳар Олмазор туманидаги 10, 23 ва 142-сонли сайлов участкалари ишига ноқонуний аралашиш, жумладан, ҳокимлик мутасаддилари маҳалла раисларига муайян номзодларни қўллаб-қуватлаш ҳақида топшириқ берганлиги билан боғлиқ маълумотлар ҳам ўрганилган.
Ушбу ҳолат бўйича текшириш ўтказилиб, бирон бир шахс томонидан юқоридаги сайлов участкалари ишига ноқонуний аралашганлик ҳолатлари тасдиқланмади.
Бош прокуратуранинг хабар беришича, Тошкент шаҳар Яшнобод туманида овозларни санаб чиқиш бўйича якуний баённома нусхасини тўлдириш ва баённома нусхаларини ҳеч кимга тарқатмаслик юзасидан ғайриқонуний кўрсатма берилиши билан боғлиқ маълумотлар текширилган.
Мавзуга доир: Журналистлар Яшнободдаги сайловларда «черновик» протоколлардан фойдаланиш ҳолатини воқеа жойига бориб ўрганди (видео)
Мазкур ҳолат юзасидан Бош прокуратура томонидан терговга қадар текшириш ҳаракатлари ўтказилмоқда.
Бош прокуратура томонидан 22 декабрь куни соат 22:00 да Telegram’да тарқалган Сергели туманидаги сайлов участкасида содир қилинган қонун бузилиш ҳолатлари акс этган видеолавҳа ҳам текширилган.
Аниқланишича, сайлов участкасида сайлов натижалари бўйича овозларни саноқдан ўтказиш ва ҳужжатларни расмийлаштириш жараёнига номзодларнинг ишончли вакиллари ва кузатувчилар киритилмаган. Саноқдан ўтказиш алоҳида хонада амалга оширилган.
Мазкур ҳолат юзасидан 23 декабрь, душанба куни Жиноят кодексининг 146-моддаси ва 209-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Бош прокуратура Учтепа туманида кузатилган сайловга аралашиши ҳолатини ҳам ўрганди. Идоранинг маълум қилишича, Ўзбекистон Либерал демократик партияси аъзоси Бобур Холматовнинг мурожаати текширилган.
Аниқланишича, Учтепа тумани ҳокимлиги ташкилий-кадрлар гуруҳи раҳбари Шерзод Нигматов Ўзбекистон Экологик партияси ички ишларига ва сайлов жараёнига ноқонуний аралашган.
Таъкидланишича, Шерзод Нигматов ва партиянинг туман кенгаши раиси Қ.Маҳкамов Либерал демократик партия аъзоси Бобур Холматов, «Адолат» партияси аъзоси Ҳулкар Юнусова ҳамда 2017 йилдан АҚШда яшаётган Санобар Азимованинг номзодини уларнинг розилигисиз ва хабарисиз Экологик партиядан Халқ депутатлари Учтепа тумани Кенгаши депутатлигига номзод сифатида кўрсатиб, сайлов ҳужжатларига сохта маълумотлар киритган.
Мазкур ҳолат юзасидан 23 декабрь куни Жиноят кодексининг 146-моддаси ва 209-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Мавзуга доир: Сайловларда қонунбузилиш ҳолатлари бўлди
Изоҳ (0)