AQSH Davlat departamenti ayrim xorijiy sayyohlar va biznes maqsadida mamlakatga keluvchi xorijliklardan 15 ming dollargacha viza garov puli undirishni rejalashtirmoqda. Ushbu dastur mamlakatda belgilangan muddatdan ortiq qolib ketish holatlarini cheklashga qaratilgan. Bu haqda The Guardian xabar berdi.
Ta’kidlanishicha, mazkur tartib AQSH prezidenti Donald Trampning birinchi muddatida — 2020-yil noyabr oyida ilk marta taklif qilingan edi. Unga ko‘ra, mamlakatda ortiqcha muddat qolish ehtimoli 10 foiz va undan ko‘proq bo‘lgan va asosan Afrika davlatlari fuqarolaridan 15 ming dollargacha garov puli olinishi belgilangandi. Biroq dastur amalda ishga tushirilmay qolib ketgandi.
Hozirgi taklif etilayotgan 12 oylik sinov dasturi 5-avgust kuni rasmiy e’lon qilinishi rejalashtirilgan. Garov puli faqat turistik va biznes vizasi egalaridan olinadi. Dastur kuchga kirishidan kamida 15 kun oldin unda qamrab olinadigan davlatlar ro‘yxati Travel.State.Gov sayti orqali e’lon qilinadi. Ro‘yxat vaqt o‘tishi bilan o‘zgarishi mumkin.
AQSH ichki xavfsizlik departamenti qoidalariga ko‘ra, sayyohlar mamlakatni o‘z vaqtida tark etgan taqdirda berilgan garov pullari qaytariladi. Shuningdek, fuqarolikka o‘tgan yoki vafot etgan holatlarda ham garov puli qayta to‘lab beriladi.
Davlat departamentining aniqlik kiritishicha, bu davlatlar ro‘yxatini shakllantirishda “ortiqcha qolish holatlari, fuqarolikni olishdagi xavfsizlik kamchiliklari va AQSH tashqi siyosatiga aloqador omillar” inobatga olinadi. Bu orada Tramp ma’muriyati migratsiya siyosatini keskin kuchaytirib kelmoqda. Xususan, prezident migrantlarning vaqtincha himoya maqomini bekor qilib, 12 ta davlatdan keluvchi fuqarolarga immigratsion viza berishni butunlay taqiqlagan edi.
Reuters xabariga ko‘ra, Chad, Eritreya, Gaiti, Myanma va Yaman davlatlari AQSHda ko‘proq qolish ehtimoli yuqori bo‘lgan va Trampning immigratsiya taqiqlaridan jabr ko‘rgan davlatlar sirasiga kiradi. Shuningdek, Burundi, Jibuti va Togo ham ushbu ro‘yxatda qayd etilgan.
Bundan tashqari, AQSH diplomatik vakolatxonalariga xorijiy talabalarning ijtimoiy tarmoqlardagi faolligini ko‘rib chiqish bo‘yicha yangi yo‘riqnomalar ham berilmoqda. Profilini ommaga ochib qo‘yishni rad etgan talabalar AQSH hukumati nazarida shubhali deb baholanadi.
Turizm sohasi esa hukumatning bu kabi siyosiy harakatlari sabab og‘ir yo‘qotishlarga uchrayotgani aytilmoqda. 2025-yil mart oyida xorijiy sayyohlar soni 11,6 foizga kamaygan. Kanada va Meksikadan tashrif buyuruvchilar esa yiliga 20 foizga qisqargan. Shuningdek, Tramp ma’muriyati ilgari surgan yangi 250 dollar miqdoridagi viza to‘lovi ham sayyohlarga qimmatga tushishi mumkin. Agar bu tartib qabul qilinsa, u dunyodagi eng yuqori viza to‘lovlaridan biri bo‘ladi.
Izoh (0)