“O‘zbektelekom” amaldagi internet tezligini yetarlicha deb hisoblamoqda

O‘zbekiston tashqi internet-kanalining 2019-yil oxiridagi tezligi soniyasiga 1200 gigabitni tashkil qilmoqda. Bu haqda Spot xabar berdi.

“O‘zbektelekom”ning ma’lum qilishicha, ayni paytda mazkur tezlik O‘zbekistonning barcha provayder va operatorlari ehtiyojini qondirish uchun yetarli hisoblanadi.

Kompaniya 2018-yilning oxirida internet o‘tkazish tezligining 10 martaga oshirilishini ma’lum qilgan edi. O‘sha vaqtga qadar tezlik soniyasiga 110 gigabitni tashkil qilgan.

O‘shanda operatorlar uchun soniyasiga 1 megabit tezlikning narxi 169 ming so‘mdan 85 ming so‘mga tushirilgani ma’lum qilingan. 2020-yilning 1-yanvaridan bu narx 56 ming so‘mga tushishi kutilmoqda.

Kompaniya tomonidan xabar berilishicha, simli internetning tezligi o‘tgan yil davomida soniyasiga 9,98 megabitdan 21,47 megabitga oshgan. Bu ko‘rsatkich mamlakatning kabelli internet tezligi bo‘yicha 180 ta mamlakat orasida 108-o‘rinni egallashiga imkon berdi. Mobil internet tezligi bo‘yicha O‘zbekiston 139 ta mamlakat orasida 135-o‘rinni egallab turibdi.