Surxondaryo viloyatida 2019-yilning yanvar—oktabr oylari davomida 984 ta ta’lim muassasasida salkam 2700 marta “Davomat” va “Tig‘” tadbirlari o‘tkazilib, 1000 ga yaqin huquqbuzarlik holatlari aniqlangan.
Viloyat IIBdan “Daryo”ga ma’lum qilishlaricha, aniqlangan holatlar yuzasidan 740 nafar ota-onaga nisbatan Ma’muriy javobgarlik to‘g‘risidagi kodeksning 47-moddasiga muvofiq hujjatlar rasmiylashtirilgan va chora ko‘rish uchun Voyaga yetmaganlar ishlari bo‘yicha idoralararo komissiyalarga taqdim etilgan.
Qayd etishlaricha, o‘quv mashg‘ulotlariga sababsiz ravishda qatnashmayotgan 147 nafar o‘quvchi aniqlanib, ulardan 121 nafarini majburiy ta’limga jalb qilish ta’minlangan.
Bundan tashqari, voyaga yetmagan shaxslarning g‘ayriijtimoiy xatti-harakatlar, ma’muriy huquqbuzarlik sodir etishlarini, ularning ko‘ngilochar (dam olish) joylarda tungi vaqtda bo‘lishlarini oldini olishga qaratilgan 1 096 ta tadbir tashkil etilgan.
“Ushbu tadbirlar natijasida 31 ta holat aniqlangan va aybli deb topilgan shaxslarga nisbatan Ma’muriy javobgarlik to‘g‘risidagi kodeksning 188-moddasiga muvofiq hujjatlar rasmiylashtirilgan”, — deyiladi viloyat IIB axborotida.
Ma’lumot uchun, Ma’muriy javobgarlik kodeksining 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) bo‘yicha aybli deb topilgan shaxslar eng kamida 111,5 ming so‘m, ko‘pi bilan 4,46 million so‘mgacha jarimaga tortilishi mumkin.
Kodeksning 188-moddasi (voyaga yetmagan shaxsni g‘ayriijtimoiy xatti-harakatlarga jalb qilish) bo‘yicha aybdor deb topilgan shaxsga nisbatan nazarda tutilgan eng yengil jazo — 2,23 million so‘m, eng og‘ir jazo 4,46 million so‘m jarima. Bolalarning tunda ko‘ngilochar joylarda bo‘lishiga yo‘l qo‘yganlarga esa 3,34 million so‘mgacha jarima solinishi mumkin.
Izoh (0)