Сурхондарё вилоятида 2019 йилнинг январь—октябрь ойлари давомида 984 та таълим муассасасида салкам 2700 марта «Давомат» ва «Тиғ» тадбирлари ўтказилиб, 1000 га яқин ҳуқуқбузарлик ҳолатлари аниқланган.
Вилоят ИИБдан «Дарё»га маълум қилишларича, аниқланган ҳолатлар юзасидан 740 нафар ота-онага нисбатан Маъмурий жавобгарлик тўғрисидаги кодекснинг 47-моддасига мувофиқ ҳужжатлар расмийлаштирилган ва чора кўриш учун Вояга етмаганлар ишлари бўйича идоралараро комиссияларга тақдим этилган.
Қайд этишларича, ўқув машғулотларига сабабсиз равишда қатнашмаётган 147 нафар ўқувчи аниқланиб, улардан 121 нафарини мажбурий таълимга жалб қилиш таъминланган.
Бундан ташқари, вояга етмаган шахсларнинг ғайриижтимоий хатти-ҳаракатлар, маъмурий ҳуқуқбузарлик содир этишларини, уларнинг кўнгилочар (дам олиш) жойларда тунги вақтда бўлишларини олдини олишга қаратилган 1 096 та тадбир ташкил этилган.
«Ушбу тадбирлар натижасида 31 та ҳолат аниқланган ва айбли деб топилган шахсларга нисбатан Маъмурий жавобгарлик тўғрисидаги кодекснинг 188-моддасига мувофиқ ҳужжатлар расмийлаштирилган», — дейилади вилоят ИИБ ахборотида.
Маълумот учун, Маъмурий жавобгарлик кодексининг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) бўйича айбли деб топилган шахслар энг камида 111,5 минг сўм, кўпи билан 4,46 миллион сўмгача жаримага тортилиши мумкин.
Кодекснинг 188-моддаси (вояга етмаган шахсни ғайриижтимоий хатти-ҳаракатларга жалб қилиш) бўйича айбдор деб топилган шахсга нисбатан назарда тутилган энг енгил жазо — 2,23 миллион сўм, энг оғир жазо 4,46 миллион сўм жарима. Болаларнинг тунда кўнгилочар жойларда бўлишига йўл қўйганларга эса 3,34 миллион сўмгача жарима солиниши мумкин.
Изоҳ (0)