Turkiya tashqi ishlar vaziri Mavlut Shavusho‘g‘lu Fransiya prezidenti Emmanuel Makronni terrorchilarni qo‘llab-quvvatlaganlikda aybladi. Bu haqda “RIA Novosti” xabar berdi.
Avvalroq Makron Turkiyaning Suriyada “Tinchlik bulog‘i” harbiy operatsiyasini boshlagani IShID terrorchilik tashkilotiga qarshi kurashayotgan xalqaro koalitsiyaga xavf solgani va Anqara NATOning qo‘llab-quvvatlashiga munosib emasligini bildirgandi.
“Makron terrorchilik davlati yaratishni ko‘zlagandi, lekin bizning “Tinchlik bulog‘i” harbiy operatsiyamiz ushbu rejani yo‘qqa chiqardi. U o‘zi ham nima deyayotganini bilmasa kerak”, — deya Chavusho‘g‘lu so‘zlarini keltirgan Milliyet gazetasi.
Turkiya TIV rahbari Makronning NATOdagi ittifoqdoshlari yonida turishi va ularga qarshilik qilishni to‘xtatishi kerakligini ma’lum qilgan.
Anqara avval ham bir necha marta Parijni Turkiyada taqiqlangan Kurdiston ishchi partiyasini qo‘llab-quvvatlayotgani uchun tanqid qilgandi.
Mavzuga doir:
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan. AQSh Turkiyaga qarshi sanksiyalar qo‘lladi.
17-oktabrda Anqara va Vashington Suriya shimoli-sharqidagi operatsiyani 120 soatga, kurdlar xavfsiz zona hududidan chiqib ketishi uchun to‘xtatishni kelishib oldi va sanksiyalar bekor qilindi.
22-oktabrda Sochida Rossiya prezidenti Vladimir Putin va Turkiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn al-Arab aholi punktidagi (Kobani) ikkinchi qo‘shma patrul tadbirlarini boshladi. 10-noyabrda Turkiya prezidenti Rajab Toyyib Erdo‘g‘on hamda Rossiya prezidenti Vladimir Putin telefon orqali suhbat qilib, Suriyadagi nizolarni hal etish borasida o‘zaro fikr almashgan. Rossiya Turkiya kelishuviga muvofiq ikki davlat harbiylari Suriya shimoli-sharqida jami 8 ta qo‘shma patrul tadbiri o‘tkazgan.
Izoh (0)