Туркия ташқи ишлар вазири Мавлут Шавушўғлу Франция президенти Эммануэл Макронни террорчиларни қўллаб-қувватлаганликда айблади. Бу ҳақда «РИА Новости» хабар берди.
Аввалроқ Макрон Туркиянинг Сурияда «Тинчлик булоғи» ҳарбий операциясини бошлагани ИШИД террорчилик ташкилотига қарши курашаётган халқаро коалицияга хавф солгани ва Анқара НАТОнинг қўллаб-қувватлашига муносиб эмаслигини билдирганди.
«Макрон террорчилик давлати яратишни кўзлаганди, лекин бизнинг «Тинчлик булоғи» ҳарбий операциямиз ушбу режани йўққа чиқарди. У ўзи ҳам нима деяётганини билмаса керак», — дея Чавушўғлу сўзларини келтирган Milliyet газетаси.
Туркия ТИВ раҳбари Макроннинг НАТОдаги иттифоқдошлари ёнида туриши ва уларга қаршилик қилишни тўхтатиши кераклигини маълум қилган.
Анқара аввал ҳам бир неча марта Парижни Туркияда тақиқланган Курдистон ишчи партиясини қўллаб-қувватлаётгани учун танқид қилганди.
Мавзуга доир:
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган. АҚШ Туркияга қарши санкциялар қўллади.
17 октябрда Анқара ва Вашингтон Сурия шимоли-шарқидаги операцияни 120 соатга, курдлар хавфсиз зона ҳудудидан чиқиб кетиши учун тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Туркия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патруль тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн ал-Араб аҳоли пунктидаги (Кобани) иккинчи қўшма патруль тадбирларини бошлади. 10 ноябрда Туркия президенти Ражаб Тоййиб Эрдўғон ҳамда Россия президенти Владимир Путин телефон орқали суҳбат қилиб, Суриядаги низоларни ҳал этиш борасида ўзаро фикр алмашган. Россия Туркия келишувига мувофиқ икки давлат ҳарбийлари Сурия шимоли-шарқида жами 8 та қўшма патруль тадбири ўтказган.
Изоҳ (0)