Albaniya mudofaa vaziri Olta Jachka vayronakor zilzila oqibatida halok bo‘lganlarning ism-sharifini o‘qiyotganida yig‘lab yubordi, deb xabar berdi “RIA Novosti”.
Albaniyada 26-noyabrga o‘tar kechasi 6,4 magnitudali kuchli zilzila sodir bo‘lgan. Eng kuchli yer silkinishlari Tirana va Durres shaharlarida sezilgan. U yerda bir qancha binolar qulab tushib, ularning ostida haligacha odamlar qolib ketgan bo‘lishi mumkin. So‘nggi ma’lumotlarga ko‘ra, 32 kishi halok bo‘lgan, 658 kishi jarohat olgan, 47 kishi vayronalar ostidan chiqarib olingan.
Albaniya bosh vaziri Edi Rama alban bayrog‘i kuni sharafiga rejalashtirilgan tantanani qoldirib, milliy motam kunini e’lon qildi hamda Tirana va Durresda favqulodda holat tartibini joriy etdi.
“Bu mening eng og‘ir nutqim. Biz 26-noyabrda zilzila oqibatida vayron bo‘lgan binolarni qaytadan qurishimiz mumkin, lekin halok bo‘lgan fuqarolarni hayotga qaytara olmaymiz”, — deydi mamlakat mudofaa vaziri.
Jachka halok bo‘lganlarning ism-sharifini o‘qiy boshladi, biroq ro‘yxatning o‘rtasiga kelganda o‘zini tutib turolmaydi va yig‘lab yubordi, keyin esa ko‘zlari to‘la yosh bilan o‘qishni davom ettirdi. Qurbonlar orasida 4 va 8 yoshli bolalar, 77 va 79 yoshli keksalar, turli yoshdagi erkak va ayollar bor.
Yana 25 kishi bedarak yo‘qolgan deb hisoblanmoqda. Ularni vayronalar ostidan qidirish ishlari davom etmoqda. Qutqaruv operatsiyalarida bir qancha davlatlardan kelgan mutaxassislar ishtirok etmoqda.
Iyulda Albaniya prezidenti Ilir Meta rasmiy maktub orqali grek seysmologi Akis Selentisning ma’lumotlariga tayanib bosh vazir Edi Rama, bosh vazir o‘rinbosari Erion Bracha va mudofaa vaziri Jachkani Bolqonda apokaliptik zilzilaga tayyorlanishga chaqirgandi. O‘shanda Jachka bunga javoban alban seysmologlariga ko‘ra, halokatli zilzila ehtimoli yo‘q va uning idorasi tabiiy ofatlarga 30 yil oldingidan ko‘ra yaxshiroq hozirlik ko‘rganini yozgan.
Izoh (0)