Toshkentda Markaziy Osiyo davlatlari rahbarlarining maslahatlashuvi uchrashuvi bo‘lib o‘tdi. Prezident Shavkat Mirziyoyev maslahat uchrashuvida muhim tashabbuslarni ilgari surdi. Shuningdek, tadbir doirasida Tojikiston va Qirg‘iziston prezidentlari, shuningdek, Qozog‘iston birinchi prezidentini qabul qildi (Turkmaniston rahbari kecha qabul qilingan edi). Maslahat uchrashuvining oxirida prezidentlar Ko‘ksaroy qarorgohida daraxt ekdi. Kuzatuvchilar Toshkentdagi uchrashuvni tarixiy deb atadi — Markaziy Osiyoning haqiqiy yetakchilari anchadan beri bundan tarkibda va bunday formatda yig‘ilmagan edi. Xabar berishlaricha, keyingi uchrashuv Qirg‘izistonda bo‘ladi.
O‘zbekistonda so‘nggi kunlarda kuzatilayotgan energetik muammolar sababli, 28-noyabr kuni bosh vazir Abdulla Aripov raisligida videoselektor yig‘ilishi o‘tkazilgan. Unda bosh vazir “hali qish kelmasidan energoresurslar ta’minotidan jiddiy muammolar paydo bo‘lgani, hatto metro va televideniyeda ham elektr energiyasi ta’minoti bilan bog‘liq noxush holatlar” yuz berganini keskin tanqid qilgan va buni “sharmandali” deb atagan. Bosh prokurorning qo‘shimcha qilishicha, o‘tgan bir hafta davomida 28 milliard so‘mlik tabiiy gaz talon-toroj qilingan (undan avvalgi haftalar-chi?).
Kanadada yengil motorli samolyot qulashi oqibatida yetti o‘zbekistonlik halok bo‘ldi. Samolyotda ikki oila — Obloqulovlar va Nabiyevlar oilasi bo‘lgan (samolyot esa Obloqulovlar oilasi boshlig‘iga tegishli bo‘lgan) . Halok bo‘lganlarning uch nafari bolalar — bari Obloqulovlarning farzandlari. Ma’lumotlarga ko‘ra, aviahalokat yuz bergan vaqtda kuchli shamol kuzatilayotgan bo‘lgan. O‘zbekiston Tashqi ishlar vazirligidan ma’lum qilishlaricha, ular dam olish kunlarini Kingston shahrida o‘tkazish uchun uchib ketayotgan bo‘lgan.
Buxoroda Nexia avtobusga urilishi oqibatida uch kishi halok bo‘ldi. Mashinaning o‘zi temir-tersakka aylandi. Hodisa 29-noyabr kuni tong soat 7:15 atrofida yuz bergan. IIV Yo‘l harakati xavfsizligi bosh boshqarmasidan “Daryo”ga ma’lum qilishlaricha, hodisa Nexia haydovchisining rulda uxlab qolishi oqibatida yuz bergan. Qurbonlarning bari — Nexia’da bo‘lgan odamlar. Avtobusdagilarga biror zarar yetmagan.
AQSh prezidenti Donald Tramp kutilmaganda rafiqasi Melaniya bilan birga Afg‘onistonga keldi. Aytishlaricha, u Afg‘oniston poytaxti Kobuldagi “Bagram” aviabazasida amerikalik harbiylar bilan Amerika milliy bayrami — Shukronalik kunini nishonlagan. Ma’lumot uchun, bu Donald Trampning AQSh prezidenti sifatida ilk bor Afg‘onistonga kelishi.
O‘qishni qat’iy tavsiya etamiz: “O‘zbekiston fuqaroligini olsam, mendan baxtli odam bo‘lmasdi”. Konduktor ayol hikoyasi; Arablarning yaqin do‘sti va ilk sudlangan prezident. Jak Shirak haqida nimalarni bilamiz?; 29-noyabr – Ё harfi tug‘ilgan kun. Bu harfning o‘z ibodatxonalari bor.
Izoh (0)