Markaziy Osiyo davlatlari rahbarlari 29-noyabr, juma kuni Islom Karimov nomidagi ilmiy-ma’rifiy yodgorlik majmuasiga tashrif buyurdi, deb xabar bermoqda Prezident matbuot xizmati.
Qayd etilishicha, Shavkat Mirziyoyev, Nursulton Nazarboyev, Sooronboy Jeenbekov, Emomali Rahmon va Gurbanguli Berdimuhamedov O‘zbekistonning Birinchi Prezidenti haykali poyiga gulchambar qo‘yib, uning yorqin xotirasiga hurmat bajo keltirgan.
Eslatib o‘tamiz, 29-noyabr kuni Toshkent shahrida Markaziy Osiyo davlatlari rahbarlarining ikkinchi maslahat uchrashuvi bo‘lib o‘tdi. Sammit ishida O‘zbekiston Prezidenti Shavkat Mirziyoyev, Qozog‘iston birinchi prezidenti — elboshi Nursulton Nazarboyev, Qirg‘iziston prezidenti Sooronbay Jeenbekov, Tojikiston prezidenti Emomali Rahmon va Turkmaniston prezidenti Gurbanguli Berdimuhamedov ishtirok etdi.
Sammit yakunida qo‘shma bayonot qabul qilindi hamda maslahat uchrashuvlariga tayyorgarlik ko‘rish va uni o‘tkazish reglamenti ma’qullandi. Markaziy Osiyo davlatlari rahbarlarining navbatdagi maslahat uchrashuvi kelgusi yili Qirg‘izistonda o‘tkazilishi belgilandi.
Samarali muzokaralardan keyin Markaziy Osiyo davlatlari rahbarlari Ko‘ksaroy qarorgohidagi faxriy mehmonlar xiyoboniga ko‘chatlar o‘tqazdi.
Izoh (0)