O‘zbekistondagi neft va gaz davlat konserni “O‘zbekneftgaz” AJda tizimli o‘zgarishlarning birinchi bosqichi yakunlandi, deb xabar bermoqda kompaniya matbuot xizmati.
Yangilangan “O‘zbekneftgaz” uchta asosiy yo‘nalishda faoliyat yurituvchi jamiyatlarga bo‘lindi. Endi faqat neft va gaz qazib olish va ishlab chiqarish bilan shug‘ullanadi.
“O‘zburg‘uneftgaz”, “O‘zneftqazibchiqarish”, “O‘zneftmahsulot”, “O‘zneftgazmash”lar “O‘zbekneftgaz” aksiyadorlik jamiyati tarkibiga kiritildi.
“O‘ztransgaz” “O‘zbekneftgaz” tarkibidan chiqarildi va tabiiy gazni sotish, sotib olish hamda yetkazib berish bo‘yicha mamlakatdagi yagona operator etib tayinlandi. “O‘zbekneftgaz”ning “O‘ztransgaz”dagi ulushlari davlat aktivlarini boshqarish agentligiga berildi.
Shuningdek, “O‘ztransgaz”ning hududiy filiallari negizida “Hududgazta’minot” AJ tashkil qilindi va davlat aktivlarini boshqarish agentligi uning aksiyadori etib belgilandi.
Mavzuga doir: “O‘zbekneftgaz”ning ustav kapitallaridagi ulushlari Davlat aktivlarini boshqarish agentligiga o‘tkazildi
Shuningdek, qarorda “O‘zbekneftgaz”ning asosiy faoliyati doirasiga kirmaydigan bir qator mol-mulklari kompaniya tasarrufidan chiqarilishi ko‘zda tutilgan hamda kompaniya ikkinchi darajali faoliyat turlari bilan shug‘ullanmasligi belgilangan.
Jumladan, “O‘zneftmahsulot” AJ tarkibidagi 1 381 ta AYoQSh auksion orqali xususiylashtirilishi; “O‘zbekneftgaz” tarkibiga kiruvchi tashkilotlarning bozorlar, savdo va chorvachilik komplekslari mahalliy hokimiyat organlariga berilishi qaror qilingan edi.
Izoh (0)