Koreya respublikasidagi eng katta Koreya ozodligi muxolifat partiyasi yetakchisi Xvan Gyo An ochlik e’lon qilganidan yetti kun o‘tgach shifoxonaga yotqizildi. Bu haqda “TASS” xabar bergan.
Gyo An mamlakatning amaldagi prezidenti Mun Chje Inning siyosatiga qarshi chiqayotgandi.
20-noyabr, chorshanba kuni Xvan Gyo An Janubiya Koreya prezidenti administratsiyasi joylashgan Moviy bino yoniga chodir tikib, ochlik e’lon qilgan. U davlat rahbarining Yaponiya bilan harbiy axborotlar almashinuvida maxfiylik kelishuvini uzaytirmaslik yuzasidan chiqargan qaroriga qarshi chiqmoqda. Saylov tizimida islohotlar o‘tkazish, yuqori lavozimdagi amaldorlarning korrupsiyaga oid jinoyatlarga aloqadorligini tergov qiluvchi alohida maxsus organ tashkil qilinishiga qarshi chiqmoqda. Siyosatchi ushbu kurash yakuni o‘lim bilan tugasa ham milliy inqirozga qarshi sobit turishini bildirgan.
Muxolifat yetakchisi 27-noyabrda kuchli charchoq va lohaslik oqibatida hushdan ketgan.
Xvan Gyo An shov-shuvli siyosiy aksiyalari bilan tanilgan. Sentabr oyida u mamlakat adliya vaziri lavozimiga Cho Gukning tayinlanishiga qarshi chiqib, sochini qirdirib tashlagan va yakunda vazir iste’foga chiqishga majbur bo‘lgan.
2019-yil aprelida Janubiy Koreya parlamenti ikkita qonun loyihasi, xususan, korrupsiyaga oid jinoyatlarni tergov qiluvchi yangi organ tashkil etish va Milliy majlisda (parlament) deputatlar mandatlari taqsimoti tuzilmasini o‘zgartirish haqidagi normativ hujjatlarni ma’qullagan. Hukmron partiya “Toburo” demokratlari va yana uchta muxolif partiya ushbu loyihani qo‘llab-quvvatlagan. Faqat Koreya ozodligi muxolifat partiyasi ushbu qonunlarning qabul qilinishiga keskin qarshilik ko‘rsatgan.
Izoh (0)