26-noyabr kuni Litva poytaxti Vilnyus shahri ko‘chalarida 50 dan ortiq traktor kolonnasi yurishni amalga oshirdi. Bu Litva fermerlar ittifoqining hukumat olib borayotgan siyosatdagi qishloq xo‘jaligi sohasiga berilgan munosabatga javob bo‘ldi. Mamlakatning boshqa viloyatlaridagi markaziy shaharlaridagi ko‘chalar ham fermerlarning “og‘ir artilleriyasi”ga to‘lib ketgan. Bu haqda “TASS” xabar qildi.
“Bugungi norozilik — ogohlantirish namoyishi. Ushbu harakat orqali hukumat a’zolariga, ularning o‘z qarorlari bilan qishloqlarni o‘ldirayotganini tushuntirmoqchimiz”, — deydi jurnalistlar bilan suhbatda donli ekinlar yetishtirish madaniyati assotsiatsiyasi rahbari Ignas Yankauskas.
Norozilik namoyishida uch mingtagacha qishloq xo‘jaligi texnikasi ishtirok etgan. Turli markadagi traktorlar, ayrim haydovchilar hatto somon ortilgan tirkamani ulagan holda ko‘chada harakatlangan. Vilnyusda kolonnani politsiya kuzatib borgan va ushbu namoyish transport qatnoviga xalaqit qilmagan. Barcha joylarda o‘tkazilgan aksiyalar hukumat bilan oldindan kelishuv asosida tashkillashtirilgan.
“O‘zimiz kutgan munosabatni olmasak, norozilik bildirishda davom etamiz”, — deydi Yankauskas. U fermerlarning avtomobil yo‘llarini yopib qo‘yishi mumkinligini ham inkor qilmadi.
Fermerlar 2020-yilgi davlat budjeti loyihasida qishloq xo‘jaligida ko‘p ishlatiladigan dizel yonilg‘isi uchun aksiz solig‘ini kamaytirishni talab qilmoqda. Ushbu aksiz yangi yilda 7,2 foizga chiqishi mumkin.
“Oxirgi uch yilda qishloq xo‘jaligi sohasidagi soliqlar besh baravarga ko‘paygan”, – deya ta’kidlagan Litva fermerlar ittifoqi vakili.
Qishloq xo‘jaligi vakillari hukumatdan Bryusselda Litva fermerlariga ham Yevropa ittifoqidagi boshqa davlatlardagi kabi ittifoq fondidan pullar ajratilishini so‘ramoqda. 2004-yilda Yevroittifoqqa a’zo bo‘lgandan keyin litvalik fermerlar dotatsiya olishni boshlagan, biroq ushbu mablag‘ boshqa a’zo davlatlarga berilayotgandan ancha kam. Yetti yil davom etgan o‘tish davridan keyin ushbu holatning muvazanatlashuvi kutilgandi, lekin fermerlarning ushbu niyati amalga oshmadi. Yevrokomissiyaning budjet takliflariga ko‘ra 2027-yilda ushbu to‘lovlar o‘rtacha ko‘rsatkichning taxminan 80 foiziga ko‘tariladi.
Izoh (0)