Gaz (va elektr) ta’minotidagi uzilishlar sabab Qoraqalpog‘istonning Nukus tumanida va Sirdaryo viloyatining Baxt shahrida odamlar yo‘llarga chiqdi. Nukus tumanidagi noroziliklar “Qirantau” ovul fuqarolar yig‘iniga kiruvchi Sho‘rtanbay ovuliga tabiiy gaz yetib bormayotgani oqibatida kelib chiqqan — aynan shu to‘polonlardan so‘ng rahbariyat qishloqqa gaz tortish, hech bo‘lmasa hududdagi maktab, bog‘cha va shifoxonalarni gazga ulash haqida o‘ylay boshlagan. Baxtda esa kechadan beri gaz-zapravka ochilishini kutib turgan haydovchilar o‘zini “O‘zbekneftgaz”, “O‘ztransgaz” xodimi deb, zapravkaning gaz hisoblash moslamasini olib, zapravkani “o‘chirib ketgach”, “Toshkent—Guliston” yo‘lini to‘sib qo‘ygan.
Elektr ta’minotidagi uzilishlar Toshkent metrosi va jonli efirlargacha yetib bordi. 27-noyabr kuni soat 10:42 da Shayxontohur tumanida joylashgan podstansiyada kabel tarmog‘i shikastlanishi natijasida metroning “G‘afur G‘ulom”, “Alisher Navoiy” va “O‘zbekiston” bekatlarida qisqa muddatli uzilish yuz bergan. Shunga o‘xshash uzilish sabab jonli efirda ketayotgan saylov debati uzilib qolgan. Toshkentda shunday muhim joylarda “svet” o‘chayotganida, viloyatlar haqida nima ham deyish mumkin?
Bosh prokuratura Jahongir Ortiqxo‘jayev bilan bog‘liq audioyozuv bo‘yicha tekshiruv natijalarini e’lon qildi. Birinchidan, prokuratura ma’lumotlariga ko‘ra, “Kun.uz” xodimlariga tashlangan Olmazor tumani hokimi sobiq o‘rinbosari Abdurasul Vahobov xos uchrashuv vaqtida jurnalistlardan uzr so‘ragan. Ikkinchidan, prokuraturaning fikricha, “Kun.uz” xodimi Bahodir Ahmedov hokim Ortiqxo‘jayev bilan xos suhbatni O‘zbekiston qonunchiligiga zid ravishda xufyona yozib olgan. Uchinchidan, Bosh prokuratura hokim Ortiqxo‘jayev amaldorlarning odob-axloq qoidalarini buzgan va buning uchun hukumat tomonidan intizomiy javobgarlikka tortilishi kerak.
Samarqandda sobiq o‘qituvchi 15 kishi tomonidan do‘pposlanib o‘ldirildi. Voqea 20-noyabrga o‘tar kechasi yuz bergan. Nizolashuvchi tomonlarni dastlab militsiya xodimlari ajratib qo‘ygan. Lekin ish shu bilan tinchimagan — alamzada tomon jabrlanuvchini bir o‘zini tutib olib, o‘lasi qilib do‘pposlagan. Marhum bir soat chamasi chalajon holda ko‘chada qolib ketgan (va ko‘rsatilgan tibbiy yordamga qaramay, 23-noyabr kuni vafot etgan). Bosh prokuratura axborotiga ko‘ra, hodisa yuzasidan uch kishi hibsga olingan. “O‘qituvchisining sobig‘i bo‘ladimi? Nima ish qilayotgan ekan o‘zi?”, deb so‘rasangiz... yaqinda o‘qituvchilikni tashlab, somsa pishirib sotishni boshlagan ekan.
O‘zbekiston madaniyat vaziri Baxtiyor Sayfullayev avjiga chiqdi. Birinchidan, “O‘zbekkonsert”da xonandalarning litsenziyasini qaytarib olish huquqi yo‘qligini ma’lum qildi. Ikkinchidan, yaqinda YTH oqibatida halok bo‘lgan aktrisa Gavhar Sharipovani “ruhan nosog‘lom bo‘lgan” deb atadi. Uchinchidan, xonanda Lolaning “Sevgingni menga ayt 2” klipi unga yoqmaganini tan oldi. Ushbu fikrlar davomiga “O‘zbekkonsert” rahbari qo‘shimcha qilib, Lolaning 2018-yil avgustidan beri litsenziyasiz ekanini e’lon qildi — qarang, litsenziyasiz ham xonanda bo‘lib ishlasa bo‘larkan.
O‘qishni qat’iy tavsiya qilamiz: 73 kun yashagan Turkiston muxtoriyati. U nega ag‘darib tashlandi?
Izoh (0)