“Xitoy—Qirg‘iziston—O‘zbekiston” temir yo‘lini qurish bo‘yicha texnik-iqtisodiy asos (TIA) tayyorlandi. Bu haqda Qirg‘iziston prezidenti Sooronbay Jeenbekov ma’lum qildi, deb yozadi Reporter.
Uning so‘zlariga ko‘ra, Rossiya texnik-iqtisodiy asosni tayyorlash uchun 200 million rubl (3,15 million dollar) ajratdi.
“Siyosiy qaror qabul qilindi. Ekspert guruhlari ishlamoqda. Xitoy tomoni rozi bo‘ldi. Men Xitoyga ikki marta tashrif buyurdim, safarlar davomida bu borada muzokaralar olib borildi. Rossiya prezidenti bilan ham muzokaralar o‘tkazildi”, — dedi prezident.
“Xitoy—Qirg‘iziston—O‘zbekiston” temir yo‘llari Xitoy temir yo‘llarini O‘zbekiston bilan, so‘ngra Afg‘oniston, Eron va Turkiya orqali Yevropa temir yo‘llari tarmog‘i bilan bog‘lashi kerak.
Dastlabki hisob-kitoblarga ko‘ra, Sharqiy Osiyodan yaqin Sharq va Janubiy Yevropaga boradigan yo‘lni 900 kilometrga qisqartiradi va vaqt 7—8 kunga kamayadi. Yo‘l qurilishi Markaziy Osiyo mamlakatlarining transport infratuzilmasini rivojlantirishni ta’minlaydi va ularga Fors ko‘rfazi va Tinch okeanining portlariga qulay kirish imkonini beradi.
Izoh (0)